Isika rehetra, teo amin'ny fiainantsika, dia samy efa nahita olona izay nanintona antsika sy nirintsika halain-tahaka. Ho an'ny ankizy manokana dia tena zava-dehibe ny hananany ohatra tsara hotahafina, ka ny tsara indrindra dia ny rainy sy ny reniny. Hahita ohatra hafa izy ireo rehefa mihalehibe, izay mifandray amin'ny tontolon'ny asa nofidiny, na amin'ny tantaram-piainan'olona novakiny tao anaty boky. Azon'izy ireo atao koa ny maka ohatra avy amin'ny tantaran ireo olona ao amin'ny Baiboly sy ny fomba niatrehan'izy ireny ny olana, ka mampitaha izany amin'ny fanandramana lainany manokana.
Indrisy fa miavosa manerana ny haino vaky jery ankehitriny ireo mpaneho ohatra ratsy. Hita etsy sy eroa ny tantara manaitra sy manafintohina-tantaram-piainan'ireo olo-malaza feno fisavorovoroana sy fahavetavetana mahamenatra. Na tsy nanana aterineto aza ireo Filipianina nanoratan'i Paoly, dia niatrika toe-javatra sahala amin'izany izy ireo.
Feno fahalotoana ara-pitondrantena sy faharatsiana tokoa tamin'ny andron'i Paoly, tahaka ny amin'izao androntsika izao ihany. Nisy mandrakariva - ary hisy hatrany, farafahakeliny hatramin'ny andro farany - ny ratsy mihoapampana. Ny fanontaniana mipetraka dia hoe: manao ahoana ny fihetsitsika eo anoloan'izany?
Vakio ny Fil. 3:17-19. Ahoana no anoritsoritana ny ohatra tsara sy ratsy ao amin'ireo andininy ireo? Inona avy ireo fanalahidy omena mba hanavahana azy ireo?
Tsara homarihintsika ny fitiavan'i Paoly ireo izay tsy mitovy hevitra aminy - mitomany noho ny amin'izy ireo izy! Mariho koa fa tsy miantso azy ireo hoe fahavalony izy, fa "fahavalon'ny hazo fijalian'i Kristy" (Fil. 3:18). Zava-dehibe lavitra noho izany no hitan'i Paoly, dia ny fomba handravan'ny hazo fijaliana ny sakantsakana ka hametrahany antsika rehetra eo amin'ny toerana iray ihany, dia eo amin'ny toerana maha mpanota mila Mpamonjy antsika (jereo ny Efes. 2:11-14).
Eo koa ny fiantsoan'i Paoly ny Filipianina mba hifantoka amin'ny ohatra tsara fa tsy ny ratsy; mba handinika tsara ireo izay mitovy fomba fiaina aminy (amin'i Paoly). Mahaliana fa niteny tahaka izany koa i Paoly rehefa nanafatra ny Romana mba "hitandrina ny amin'izay mahatonga fisarahana sy ny fahatafintohinana tsy araka ny fampianarana efa nianaranareo" ka hoy izy: "Mialà amin'ireny olona ireny" Rôm. 16:17. Ireo mpamitaka tany Roma dia nolazainy fa "tsy mba manompo an'i Kristy Tompontsika, fa ny kibony ihany." - Rôm. 16:18.
Na i Jesôsy aza no modely tokana tonga lafatra tokony harahintsika, dia misy olona hafa koa, farafahakeliny amin'ny lafiny sasany, izay mety ho ohatra tsara. Ary ianao kosa, karazana ohatra manao ahoana no asehonao ny hafa?