Tsy menatra nanambara ny maha-Izy Azy na niantso vavolombelona hanambara ny momba Azy I Jesôsy , eny fa na dia efa nodimandry efa ela aza izany vavolombelona izany, anisan'izany i Abrahama. "Ravoravo Abrahama rainareo hahita ny androko; ary nahita izy ka faly." - Jao. 8:56.
Nahoana no zava-dehibe tokoa ny fijoroan'i Abrahama ho vavolombelona ka nampidirina tao amin'ny filazantsaran'i Jaona mihitsy? Gen. 12:3; Gen. 18:16-18; Gen. 26:4; Mat. 1:1; Ma. 3:25.
"Tamin'ny alalan'ny mason'ny finoana no nitazanan'ilay patriarika ny Mpamonjy izay ho avy. Nolazainli Jesôsy tamin'ny Jiosy izany, fa hoy Izy: Ravaravo Abrahama rainareo hahita ny androko; ary nahita izy ka faly'. Ny ondrilahy natolotra ho fanatitra odorana ho solon'i Isaka dia nampiseho ny Zanak’Andriamanitra izay novonoina nisolo antsika. Rehefa voaheloka ho faty ny taranaleolombelona noho ny tsy fankatoavany ny didin'Andriamanitra, dia sady nijery ny Zanany Andriamanitra no nilaza tamin'ny mpanota hoe: 'Ho velona hianao, satria, efa nahita fanavotana ho anao Aho.'- PM, tt. 136, 137, ed. 2014.
Rain'ny firenena jiosy i Abrahama. Nomena teny fikasana izy fa avy aminy no hitahiana ny firenena rehetra. Tamin'ny alalan'ny Mesia, izay teraka tao anatin'ny tetiarany, no nahatongavan'izany fitahiana izany.
Rain'izay rehetra mamaly ny antson'Andriamanitra koa i Abrahama (Heb. 11:8, 17-19). Tsy porofon'ny finoana fotsiny ny fetezany hanolotra an'i Isaka ilay zanaky ny teny fikasana ho fanatitra (Gen. 22) fa varavarankely misokatra hoenti-maneho ny drafi-pamonjena koa.
Rehefa niteny toy izao i Jesôsy : "Ravoravo Abrahama rainareo hahita ny androko" - Jao. 8:56, dia izao no navalin'ireo mpitarika Azy: "Tsy mbola dimam-polo taona akory Hianao, ka dia efa nahita an'i Abrahama va?" - Jao. 8:57.
Mahatalanjona ny valin-tenin'i Jesôsy teo anatrehan'izany: "Lazaiko aminareo marina tokoa: Fony tsy mbola ary Abrahama, dia Izy Aho." - Jao. 8:58.
Nampiasa fomba fiteny izay mampahatsiahy ny zavatra nambaran'Andriamanitra an'i Mosesy tao anatin'ny roimemy nirehitra i Jesôsy . Fanambarana ny maha-Andriamanitra Azy izany, dia Izy Hay tsy nisy nahary. Tsy isalasalana fa takatr'ireo mpitarika ny hevitra tao ambadiky ny teny nambarany satria "naka vato hitoraka Azy" izy ireo (Jao. 8:59).
Vakio ny Rôm. 4:1-5. Ahoana no ampiasan'i Paoly ny tantaran'i Abrahama mba hanambarana ny fahamarinana lehiben’ny famonjena amin'ny finoana irery ihany fa tsy amin'ny asan'ny lalana? Ahoana no anampian'ireo toko sy andininy ireo antsika hahatakatra ny maha-rain'izay velona amin'ny finoana Abrahama?