Hodinihina mandritra ny herinandro: Gen. 1:26.27; Kol. 1:13-19; Jao. 1:1-3; Efes. 1:22: 1 Kor. 12:12-27; 1 Kor. 4:9; Rôm. 6:3,4.
Tsianjery: "Izy [Kristy] no endrik Andriamanitra tsy hita, ny Lahimatoa talohan’izao zavatra ary rehetra izao; fa tao aminy no nahariana ny zavatra rehetra any an-danitra sy ety ambonin'ny tany, dia ny hita sy ny tsy hita, na fiandrianana, na fanjakana, na fanapahana, na fahefana, Izy no nahariana ny zavatra rehetra, sady ho Azy izany, ary Izy no talohan'ny zavatra rehetra, sady ao aminy no aharetan'ny zavatra rehetra." - Kol. 1:15-17
Ho tohizantsika ao amin'ny lesona mandritra ity herinandro ity ny fandinihana momba ny epistily ho an'ny Kolosianina (jereo ny Lesona 1 sy 2). Hitantsika tao amin'ny lesona 2, fizarana Alakamisy, fa nivavaka ho an'ireo mpino tany Kolosia i Paoly ao amin'ny Kôl. 1:9-12, ary nangataka ny hananan'izy ireo fiainana mifanaraka amin'ny sitrapon'Andriamanitra. Mampitaha fanjakana roa izy ao amin'ny and. 12 sy 13: ny mazava sy ny maizina, "ny fanjakan'ny mazava" (Kôl. 1:12, dikanteny NIV) sy ny "fahefan'ny maizina" - Kôl. 1:13. Nomen'Andriamanitra Ray antsika ny toetra ilaina mba hahafahantsika miombona amin'ny lova maharitra mandrakizay ao amin'ny fanjakan'ny mazava. Efa nafahany tamin'ny fahefan'ny maizina isika ary nafindrany "ho amin'ny fanjakan'ny Zanany malalany, Izay ananantsika fanavotana, dia ny famelana ny helotsika." - Köl. 1:13,14.
Tahaka izao izany raha lazaina amin'ny teny hafa: ao amin'i Jesôsy, izay Andriamanitra Mpamorona antsika koa, no ahazoantsika fanavotana. Izy no nahatanteraka ny fanavotana ho antsika, ary amin'ny alalan'ny finoana Azy no namindrana antsika avy amin'ny fanjakan'ny maizina ho amin'ny fanjakan'ilay Zanaka malalan'Andriamanitra.
Hojerentsika amin'ity herinandro ity ny anankiray amin'ireo fanambarana feno sy miezinezina indrindra momba an'i Jesôsy ao amin'ny Testamenta Vaovao. Inona no hevitr'izao: i Jesôsy dia sady "endrik'Andriamanitra tsy hita no "Lahimatoa talohan'izao zavatra ary rehetra izao - Kôl. 1:15?
*Famerenana ny lesona ny sabata 21 Febroary.