Hodinihana mandritry ny herinandro : Jao. 5:17,20,36-40,46,47; Jao. 13:18; Jao. 17:12; Jer. 2:13; Zak. 9:9; Jao. 8:12-30.
Tsianjery: "Fa Izaho kosa manana fanambarana lehibe noho Jaona; fa ny asa nomen'ny Ray Ahy hovitaiko, dia izany asa ataoko izany no manambara Ahy fa nirahin'ny Ray." - Jao. 5:36.
Hitantsika manerana ny bokin'i Jaona ireo teny rehetra nolazain'i Jesôsy izay manambara fa Izy tokoa no Mesia (hammashiach), Ilay Kristy, Izay tonga teo amin'ny Isiraely. Ary tonga iray tamin'izy ireo tokoa Izy, teraka Jiosy tao Betlehema, dia araka ny efa nambaran'ny Soratra Masina mialoha.
Araka ny nosoratan'i Jaona anefa dia "Teo amin'izao tontolo izao Izy, ary Izy no nanaovana izao tontolo izao, nefa izao tontolo izao tsy nahalala Azy." - Jao. 1:10.
Nefa izao tontolo izao tsy nahalala Azy hoe? Mahagaga izany fanambarana izany. Ary araka ny hitantsika ao amin'ny Jaona sy ireo filazantsara hafa dia maro tokoa ireo tsy nahalala Azy na dia tokony ho nahalala aza, noho ireo zavatra nataon'i Jesôsy sy nolazainy indrindra, ary satria koa aza, manondro Azy ny Soratra Masina.
Handinika ireo fomba maro hafa nanehoan'i Jaona an'i Jesôsy ho Mesia isika amin'ity herinandro ity, ary koa ny antony mahatonga ny olona sasany mbola handà Azy ihany, na dia eo aza ireo porofo mazava rehetra manambara ny maha-Kristy Azy.
Inona ny lesona azontsika raisina avy amin'ny fahadisoan'izy ireo?