Hita ao amin'ny filazantsaran'i Jaona ny sasany amin'ireo tantara mam-palahelo indrindra ao amin'ny Soratra Masina: "Ary ny mazava dia mamirapiratra ao amin'ny maizina; fa ny maizina tsy nandray azy. (...) Teo amin'izao tontolo izao Izy, ary Izy no nanaovana izao tontolo izao, nefa izao tontolo izao tsy nahalala Azy. Tonga tany amin'ny Azy Izy, fa ny Azy tsy nandray Azy." - Jao. 1:5, 10, 11. Nolavin'ny maro tamin ireo olony Ilay "Izaho, izay Izy".
Tsy mahagaga raha toa nampitandrina i Paoly taty aoriana hoe: "Koa aza manary ny fahasahianareo" Heb. 10:35. Araka izay efa naverimberina tamintsika dia nolavina i Kristy satria tsy nandray ny Teniny ny olona.
"Miantomboka amin'ny fisalasalana ny fomba fisainan'ny olombelona amin'ny vanim-potoana ankehitriny. Mametra-panontaniana mikasika ny zavatra rehetra ny olona mba hamantarana ny marina. Izay mahajoro aorian'ny afon'ny fanadihadiana mivaivay no eken'izy ireo ho fahalalana mafy orina toy ny vatolampy, dia zavatra izay azony ametrahana ny finoany. Mampihatra izany fomba fiasa izany amin'ny Baiboly ny olona sasany ka mametra-panontaniana momba ny zavatra rehetra ary miantehitra amin'ny fomba fijery ara-tsiansa, ara-tantara, ara-psikolojia, araka ny fahalalana momba ny fahagola na koa ny fahalalana momba ny haibolantany ("géologie"), mba hahafahany mamaritra izay marina ao amin'ny Baiboly. Ny fisalasalana momba ny fahamarinan'ny Soratra Masina no iaingan'izany fomba fiasa izany sy iorenany. Hoy i Kristy: "raha avy ny Zanak'olona, moa hahita finoana ety ambonin'ny tany va Izy?" - Lio. 18:8." - E. Edward Zinke and Roland Hegstad, The Certainty of the Second Coming, (Hagerstown, MD: Review and Herald Publishing Association, 2000) t. 96.
Vakio ny Nom. 13:23-33. Inona no nahasamy hafa ireo tatitra nataon'ireo mpisafo tany rehefa niverina avy tany Kanana?
Ny fahotan'ny Hebreo fony izy ireo tao Kadesy Barnea dia ny nisalasalany momba ny Tenin'Andriamanitra. Nasain'Andriamanitra niakatra mba haka ny tany izy ireo. Mpisafo tany roa ambin'ny folo no nalefa tany Kanana mba hisafo ny tany. Niverina izy ireo ary nitondra tatitra roa. Tatitra miiba no nentin'ny ankamaroany: "misy olona vaventy be ao amin'ilay tany, mimanda ny tanana, manana fitaovam- piadiana tsy mbola fahita hatrizay ireo olona ao ary tsara hofana ny tafiny. Isika anefa nandevozina tany amin'ny tany Egipta, ary zara raha manana traikefa ara- tafika." Rehefa izay dia nifidy ny "tsia" ireo mpisafo tany, safidy niorina teo amin'ny porofo araka ny fomba fijerin'olombelona izany. Ireo mpisafo tany roa izay nandany ny "eny" mba hakana ny tany kosa dia nampiorina ny finoany teo amin'ny herin'ny Tenin'Andriamanitra.
Ahoana no isorohantsika ny famerenana ny fahadisoana izay nataon'ny Isiraelita teto? Eo ankilan'izany anefa, ahoana no ialantsika amin'ny fitompoan-teny fantatra, izay mahatonga antsika hanao hadalana kanefa mino isika fa manao ny sitrapon'Andriamanitra ka hahomby?