LALÀNA HAFA KOA
Noho ny famindrampony dia nampianatra ireo mpitsara ny fomba fitondrana ny olona amin'ny toe-javatra samy hafa Andriamanitra, momba ny zon'ny tompom-pananana. Voatanisa amin'izany ny momba ny tranga maromaro; ohatra: ny tokony hatao raha manoto ny ombin'ny namany ny ombin'ny olona iray, na raha nisy olona nangalatra biby fiompy ka nivarotra izany. na raha nisy biby nihinana biby nihinana ahitra tany an-tsaha na tanim-boaloboky ny olon-kafa, na raha nisy olona nindran-javatra tamin'ny namany ka avy eo nangalarina taminy izany, na raha naratra na maty ny biby nohofaina (Eks. 21:33-22:15).
Vakio ny Eks. 22:16--23:9. Inona avy ireo olana voaresaka ao amin'ireo lalana ireo ary ahoana no nandaminana azy?
Misahana lafin-javatra isan-karazany ny lalan'Andriamanitra. Nisy fitsipika manokana manohitra ny fanambaniana na fanalam-baraka ny olona. Tsy tian Andriamanitra izay rehetra mety ho fanararaotana. Manitsy ny fironana feno fahotana ao amin'ny fon'olombelona Andriamanitra noho ny famindrampony ary mifehy ny fironana ratsy ao anatin'ny olona. Natao harovana ny fiarahamonina, ny ratsy hofongorana, ary ny fifandraisana tsara eo amin'ny olona hokolokoloina. Tsy maintsy manapaka ny fihetsika sy ny atao rehetra ny fahamarinana sy ny fitiavana.
Vakio ny Eks. 23:10-19. Inona ireo olana lehibe resahina eto?
Fanompoam-pivavahana ny Sabata sy ireo andro firavoravoana, ary fampaha-tsiahivana ireo tranga manan-danja teo amin'ny tantaran'ny famonjena. Narafitra tsara ny fanompoam-pivavahana satria io no fototra teolojika iorenan'ny hetsika hafa rehetra. Tamin'ny Famoronana no naorina ny Sabata (Gen. 2:2,3; Eks. 20:8-11); mifandray amin'ny fanafahana sy ny fanavotana ny Isiraely izany (Deo. 5:12-15), ary maneho mazava ny fiankohofana amin'Andriamanitra amin'ny maha-Mpamorona, Mpanavotra, ary Tompontsika Azy (Mar. 2:27,28).
Nisy andro firavoravoana telo lehibe koa tsy maintsy nankalazain'ny Isiraely isan-taona: (1) ny Paska na andron'ny mofo tsy misy masirasira rehefa lohataona (matetika manomboka eo amin'ny antsasaky ny volana Marsa ka hatramin'ny antsasaky ny volana Avrily); (2) ny Pentekosta na ny andro firavoravoana amin'ny fijinjana (na andro firavoravoana manarakaraka ireo herinandro), fito herinandro aorian'ny Paska, ka araka izany, manomboka 50 andro ao aoriany; ary (3) ny fetin'ny tabernakely (na andro firavoravoana fitoerana amin'ny trano rantsan-kazo) na ny andro firavoravoana amin'ny fanangonana vokatra amin'ny fararano (matetika manomboka eo amin'ny antsasaky ny Septambra ka hatramin'ny antsasaky ny Oktobra; jereo koa ny Eks. 34:18-26, Lev. 23:4-44, Nom. 28:16-29:40, Deo. 16:1-16).