Vakio ny Sal. 105. Inona avy ireo vanim-potoana ara-tantara mbamin'ny lesona ampitain'izany asongadina ao amin'io Salamo io?
Tranga manan-danja, izay namaritra ny fifandraisam-panekena teo amin'Andriamanitra sy ny Isiraely olony no ampahatsiahivin'ny Sal. 105. Mifantoka amin'ny fanekena nataon'Andriamanitra tamin'i Abrahama izany, izay nanomezany toky fa homeny azy sy ny taranany ny Tany Nampanantenaina. Voalaza koa ny fomba nanatanterahan'Andriamanitra io teny fikasana io - izay nohamafisina tamin'i Isaka sy i Jakoba - tamin'ny alalan'i Josefa, Mosesy, Arôna, ary tamin'ny fotoana nakana ny tany Kanana. Mitondra fanantenana ho an'ny vahoakan'Andriamanitra rehetra mifandimby io Salamo io, satria ny asa mahatalanjona nataon'Andriamanitra tamin'ny lasa dia manome antoka ny tsy fiovan'ny fitiavan'Andriamanitra ny olony amin'ny fotoana rehetra (Sal. 105:1-5,7,8).
Misy itoviany ihany ny Sal. 105 sy ny Sal. 78 (jereo ny lesona omaly) saingy tsy mitantara ny fahadisoana lasa nataon'ny vahoaka ny Sal. 105. Manan-tanjona hafa izy.
Averina ny tantara ao amin'ny Sal. 105, izay itantarana ny fiainan'ireo patriarika lehibe indrindra teo amin'ny Isiraely, ahitana ny fitondran'Andriamanitra, ary ny fiaretana sy ny faharetan'ireo patriarika ireo tao anatin'ny sarotra. Novaliana soa tokoa ny faharetana sy ny fahatokian'izy ireo. Koa manasa ny olona hanam- pinoana tahaka ny an'ny patriarika ny Sal. 105, ary koa hiandry amin-toky ny fanafahan'Andriamanitra amin'ny fotoany.
Miendrika hira ny Sal. 105 (Sal. 105:1-7), izay maneho fa mila mahafantatra ny zava-nitranga teo amin'ny tantarany ny vahoaka mba hahazoany midera an'Andriamanitra marina araka ny tokony ho izy. Sady manaporofo ny maha-marina ny finoantsika ny tantara no mampiseho koa ireo antony tsy tambo isaina tokony hiderana an'Andriamanitra.
Ambara ho taranak'i Abrahama sy taranak'i Jakoba ny mpivavaka (Sal. 105:6), ary izany dia raisina ho fahatanterahan'ny teny fikasana nataon'Andriamanitra tamin'i Abrahama mba hahatonga azy ho firenena lehibe (Gen. 15:3-6). Asongadin'ny mpanao Salamo mazava ny fifandraisana mitohy eo amin'ireo patriarika sy ireo taranaky ny vahoakan'Andriamanitra aty aoriana. Tsindriany tsara fa "Manerana ny tany rehetra ny fitsarany" - Sal. 105:7, ka anariny ny mpivavaka tsy hanadino fa Tompo sy Mpanjakan'izao tontolo rehetra izao koa ny Andriamanitsika, ary ny olona rehetra no anehoany ny fahatsaram-pony (Sal. 96:1; Sal. 97:1). Mazava fa antso ho amin'ny fahatokiana, izay alefa amin'ny taranaka mpino rehetra izany.
Ahoana no tokony handraisantsika ny tenantsika ao anatin'io tetiarana io, izay manomboka amin'i Abrahama no ho mankaty? (Jereo ny Gal. 3:29.). Inona ny lesona tokony hotsoahintsika avy amin'io tantara io?