Nomen'Andriamanitra fahefana hitsara amim-pahamarinana ireo mpitarika tao Isiraely (Sal. 72:1-7, 12-14). Natao hampiasa ny fahefany araka ny sitrapon’Andriamanitra ireo mpanjakan’ny lsiraely. Ny hitandro ny fiadanana sy ny fahamarinana ao amin’ny fireneny, ary ny hitsinjo ireo mahantra eo amin’ny fiaraha-monina, no tena tokony himasoan'ireo mpitarika. Amin’izay ihany vao hambinina ny tany sy ny vahoaka manontolo. Ny fahatokiana amin’Andriamanitra no manamafy orina ny seza fiandrianan’ny mpanjaka fa tsy ny herin’olombelona.
Vakio ny Sal. 82. Inona no mitranga rehefa manao ny tsy rariny ny mpitarika ka mampahory ny vahoaka izay nampiandraiketina azy mba harovany?
Manonona ny fitsarany ho an’ireo mpitsara tsy marina ao Isiraely Andriamanitra ao amin’ny Sal. 82. Ireo “andriamanitra” resahina ao (Sal. 82:1,6) dia mazava fa tsy sampy na anjely tsy akory satria tsy nankinina tamin’ireo velively ny fitsarana amim-pahamarinana ny vahoakan’Andriamanitra; koa tsy azo tsaraina ny amin’ny tsy fanatanterahany izany izy ireo. Ireo heloka tanisaina ao amin’ny Sal. 82:2-4 dia mampahatsiahy ireo lalàna ao amin’ny Torah, izay manonona ireo mpitariky ny Isiraely hoe “andriamanitra” (Deo. 1:16-18; Deo. 16:18-20; Jao. 10:33-35). Mamotopototra ireo “zanak'olombelona” Andriamanitra raha mitsara mahitsy izy ireo, ary tononina ny sazin’izy ireo satria hita ho tsy marina izy ireo. Mitsapatsapa ao anatin’ny haizin’ny tsy fahalalana ireo mpitarika (Sal. 82:5), satria nahafoy ny lalàn'Andriamanitra, izay fahazavana, izy ireo (Sal. 119:105).
Hamafisin’ny Soratra Masina tsara fa Jehôvah irery ihany no Andriamanitra. Zarain'Andriamanitra amin’ireo olombelona mpitarika voatendry hisolo tena Azy ny fitondrany (Rôm. 13:1). Impiry impiry anefa ireo olona solontenany ireo no tsy manao tsara ny andraikitra nankinina taminy, na araka ny hita teo amin’ny tantara na ny hita ankehitriny?
Ahariharin’ny Sal. 82 ny fihemoran’ireo mpitarika sasany izay nihevitra ny tenany ho “andriamanitra” ambonin'ny olona hafa rehetra. Na nomen’ny Tompo fahefana sy tombontsoa aza ireo mpitarika isiraelita mba ho solontenan’Andriamanitra ka nantsoina hoe “zanaky ny Avo Indrindra”, dia lavin’Andriamanitra ny mpitarika ratsy fanahy. Ampahatsiahivin’Andriamanitra azy ireo fa olombelona mety maty ihany izy ireo ary fehezin’ny lalàna môraly toy ny olona rehetra. Tsy misy olona natao ho ambonin’ny lalàn'Andriamanitra (Sal. 82:6-8).
Hitsara ny tany manontolo Andriamanitra; hampamoahina eo anatrehan’Andriamanitra koa ny vahoakany. Na ny mpitarika na ny olona tarihina dia tokony hanaraka nyohatra omen’llay Andriamanitra Mpitsara ka hametraka ny fanantenan'izy ireo fara-tampony ao Aminy.
Karazam-pahefana inona no anananao amin’ny hafa? Araka ny marina sy ny rariny ve no ampiasanao izany fahefanao izany? Diniho tsara ny momba izany.