Vakio ny 2 Kôr. 5:10; Rôm. 14:10,11 ary ny Apôk. 20:11-15. Inona no ambaran'ireo toko sy andininy ireo momba ny antony hananganana indray ny ratsy fanahy?
Mba hamahana ny olan'ny fahotana ka tsy hisehoan'ny faharatsiana intsony, dia tsy maintsy resy lahatra ny rehetra fa manao ny rariny Andriamanitra ary marina eo amin'ny lalany rehetra. Amin'ny farany, dia hilefitra ny lohalika rehetra ary hiaiky ny rariny ataon'Andriamanitra ao amin'ny fifanandrinana lehibe, eny fa na i Satana sy ireo anjely ratsy aza dia hiaiky fa tsy misy na Inona na Inona afaka manamarina ny fikomiana atao amin'Andriamanitra. Mariho izao hevitra nosoratan'i Ellen G. White izao: "Raha vantany vao nosokafana ny boky firaketana ka mitopy amin'ny ratsy fanahy ny mason'i Jesôsy , dia tsaroan'izy ireo ny fahotana rehetra nataony hatrizay. Hitany tsara ny toerana izay nivilian'ny diany hiala ny lalan'ny fahadiovana sy ny fahamasinana, hitany koa ny lalana nitondran'ny avonavony sy ny fikomiany azy handika ny lalan'Andriamanitra. Ny fakam-panahy mamitaka izay nomeny toerana tamin'ny fanaranany fo tamin'ny fahotana, ireo fitahiana nampiasaina tamin'ny tsy izy, ireo mpitondra hafatr'Andriamanitra natao tsinontsinona, ireo fampitandremana nolavina, ireo onjam-pamindrampo nasesiky ny fo mafy sy tsy mibebaka hiverin-dalana izany rehetra izany dia toa voasoratra tamin'ny soratra afo avokoa. (...)
Voantso hiseho eo anatrehan'ny fitsaran'Andriamanitra avokoa ny ratsy fanahy rehetra, voampanga ho namadika ny fitondram-panjakan'ny lanitra. Tsy misy mpisolovava hiaro azy ireo; tsy manana fialan-tsiny izy; koa dia mivoaka ny didim-pitsarana hanameloka azy amin'ny fahafatesana mandrakizay."- HM, tt. 693, 695.
Vakio ny Apôk. 20:9; Sal. 37:20 ary ny Mal. 3:19. Inona no hevitra ambaran'ireo andalan-teny ireo amintsika mikasika ny famongorana farany atao amin'ny fahotana sy ny mpanota ary ny valisoa homena ny marina?
Izao no vaovao mahafaly: haringana ao amin'ny farihy mirehitra afo i Satana sy ireo anjely ratsiny. Ho foana tanteraka ny fahotana sy ny mpanota. Araka ny Apôk. 20:10, dia ho levona sy ho ringana izy ireo fa tsy hampijaliana mandrakizay tsy akory. Ampiasaina eto ny teny hoe "mandrakizay mandrakizay." Miankina amin'ny tontolon-kevitra, ny teny hoe "mandrakizay" dia tsy midika mandrakariva hoe "tsy misy fiafarana", fa azo ilazana ny hoe "mandra-pahatanteraka ny zavatra anankiray" izany (jereo ny Eks. 21:6; 1 Sam. 1:22, 28; Joda 7; ary ny 2 Pet. 2:4-6). Ho an'ireo very, ny faharinganana fa tsy ny asa fandringanana no mandrakizay. Tsy mpampahory mandrakizay Andriamanitra.
Amin’ny farany, dia mandrakizay roa no miandry ny olona rehetra. Ny very dia handray ny "tambiny" izay sahaza ny asan’ny fahafatesana mandrakizay. Nahoana no ao amin'ny fitokiana amin'ny fahamarinan'i Jesôsy no hany fanantenana ho antsika mba tsy handraisantsika ny tambiny sahaza antsika, dia ny fahafatesana?