Hodinihina mandritra ny herinandro: Mar. 8:22-38; Mat. 20:29-34; Jao. 12:25; Mar. 9:1-50; Mal. 4:5,6; Lio. 9:30,31.
Tsianjery: "Ary nantsoiny hanatona Azy ny vahoaka mbamin'ny mpianany, dia hoy Izy taminy: Raha misy ta-hanaraka Ahy, dia aoka izy handà ny tenany sy hitondra ny hazo fijaliany ka hanaraka Ahy."- Mar. 8:34.
Mifantoka amin'i Jesôsy sy ny maha-Izy Azy ny tapany voalohany amin'ny bokin'i Marka. Samy manondro ny maha-Mesia Azy ny fampianarany mafonja sy ny fahagagana ataony. Eto amin'ity tapany faharoan'ny boky ity i Jesôsy dia manontany ny mpianany hoe: Manao Ahy ho iza moa ianareo?
Novalian'i Petera tamin'ny feo mafy io fanontaniana io, ary avy hatrany i Jesôsy dia nanomboka nanazava ny fizotry ny diany amin'ny maha-Mesia Azy sy ny hiafaran'izany dia izany, izay fantatsika fa ny hazo fijaliana.
Momba io diany io no ifantohan'ny fampianaran'i Jesôsy ao amin'ny tapany faran'ny Mar. 8 ka hatramin'ny Mar. 10. Nambaran'i Jesôsy mialoha, ao amin'ireo toko ireo, ny momba ny hazo fijaliana. Avy eo dia nanao fampianarana manokana momba ny maha-mpianatra Izy. Mbola manan-danja mandraka ankehitriny ireo lesona lehibe ireo.
Manamarika ity fizarana ity ny nanasitranan'i Jesôsy lehilahy jamba anankiroa samy hafa, ny iray ao afovoan'ny Mar. 8, ary ny iray any amin'ny faran'ny Mar. 10. Mifono fampianarana manaitra momba ny maha-mpianatra ireo fahagagana ireo, izay anomezan'Andriamanitra antsika fahendrena ara-panahy hahafantarantsika an'i Jesôsy sy ny Ialan-kalehany. Nitondra fihaikana teo amin'ny fiainan'ireo mpianatra roa ambin'ny folo lahy ny fampianaran'i Jesôsy 2000 taona lasa izay, ary mbola toy izany koa amin'ireo mpianany ankehitriny. Vidin-dafo tokoa ny fanarahana an'i Jesôsy, ary inona kosa ny tombony?