Vakio ny Sal. 135. Inona ireo tranga ara-tantara asongadina eto? Inona avy ireo lesona tsoahin'ny mpanao Salamo avy amin'izany?
Miantso ny vahoakan'Andriamanitra hidera ny Tompo ny Sal. 135 noho ny fahatsarany sy ny fahatokiany izay hita porofo ao amin'ny Famoronana (Sal. 135:6,7), sy ny tantaran'ny namonjeny ny Isiraely tamin'ny Egiptianina (Sal. 135:8,9), ary ny nakany ny Tany Nampanantenaina (Sal. 135:10-12).
Nampiseho ny fahasoavany Andriamanitra tamin'ny nifidianany ny vahoaka Isiraely ho rakitra soa ho Azy (Sal. 135:4). Maneho ny fifandraisam-panekena miavaka misy eo amin'ny Tompo sy ny vahoakany ny hoe "rakitra soa" (Deo. 7:6-11; 1 Pet. 2:9,10). Noho ny sitrapon'Andriamanitra manapaka ny zavatra rehetra no nahatonga ny fifidianana ny vahoaka Isiraely, ary araka izany dia tsy misy na inona na inona avy amin'ny Isiraely tokony hahatonga azy hahatsiaro ny tenany ho ambony noho ny vahoaka hafa. Aseho ao amin'ny Sal. 135:6,7 fa tsy nanomboka tamin'ny Isiraely tsy akory ny fikasan'Andriamanitra hamonjy ny taranak'olombelona fa hatrany amin'ny Famoronana. Noho izany dia tokony hanatanteraka amim-panetren-tena ny andraikitra voatendry hataony ao anatin'ny drafi-pamonjen'Andriamanitra an'izao tontolo izao ny Isiraely.
Ny fitantarana ireo zava-dehibe nataon'Andriamanitra ho an'ny vahoakany (Sal. 135:8-13) dia tonga amin'ny faratampony miaraka amin'ilay fanomezan- toky fa "hitsara" ny olony Andriamanitra ary hangoraka azy ireo (Sal. 135:14). Ny fitsarana resahina eto dia ny fanomezan'Andriamanitra rariny ireo ory sy mijaly (Sal. 9:4; Sal. 7:8; Sal. 54:1; Dan. 7:22; Deo. 32:36). Koa miantso ny vahoakan'Andriamanitra ny Sal. 135 mba hatoky ny Tompo sy hitoetra ho mahatoky amin'ny fanekeny.
Mahatonga ny mpanao Salamo hanamafy ny maha zava-poana ny sampy sy ny maha-Tompon'ny tompo sy Mpanjakan'ny mpanjaka an'i Jehovah eto amin'izao tontolo izao ny fahatokian'Andriamanitra amin'ny vahoakany (Sal. 135:15-18). Ny fianteherana amin'ny sampy dia mahatonga ny mpivavaka tsy hanam-panantenana sy tsy hanan-kery, tahaka ny sampiny ihany (Sal. 135:18). Asehon'io Salamo io fa natao hoderaina amin'ny maha-Mpamorona sy Mpamonjy ny vahoakany Azy i Jehovah. Voaseho mazava izany hevitra izany ao amin'ny didy fahefatra izay ambaran'ny Baiboly amin'ny fomba anankiroa: ny iray ao amin'ny Eks. 20:8-11, ary ny iray ao amin'ny Deo. 5:12-15. Andriamanitra irery no natao hiankohofana, ary na inona na inona, na iza na iza ankoatra Azy dia sampy.
Ahoana no hahazoantsika antoka fa tsy manana sampy isika eo amin'ny fiainantsika? Nahoana no mora tokoa, tsy araka izay mety hiheverantsika azy, ny manompo sampy?