Vakio ny Sal. 130. Ahoana no anehoana ny faharatsian'ny fahotana sy ny fanantenana ho an'ny mpanota eto?
Mifandraika amin'ny helony sy ny heloky ny olony ny fahoriam-ben'ilay mpanao Salamo (Sal. 130:3,8). Lehibe loatra ny heloky ny olona ka mitady hampisaraka azy ireo amin'Andriamanitra mandrakizay (Sal. 130:3). Miresaka ny amin'ny firaketana ny fahotana izay tehirizina ho amin'ny andro fitsarana ny Soratra Masina (Dan. 7:10; Apôk. 20:12), ary koa miresaka momba ny anaran'ny mpanota izay esorina tsy ho ao amin'ny bokin'ny fiainana (Eks. 32:32; Sal. 69:28; Apôk. 13:8).
Mangataka ny famindram-pon'Andriamanitra, izay hamono ny firaketana ny fahotana, ilay mpanao Salamo (Sal. 5:1, 9; Jer. 31:34; Mika 7:19). Fantany mantsy fa "tsy toetra raikitra ao amin'Andriamanitra ny fahatezerana. Fa mandrakizay ny fitiavany. Ny tsy fahaizan'ny olombelona mankasitraka ny fitiavany no manetsika ny 'fahatezeran'Andriamanitra'. (...) Tsy ny handratra no tanjon'ny fahatezerany, fa ny hanasitrana ny olombelona; tsy ny hanimba fa ny hamonjy ireo vahoakan'ny Fanekeny (jereo ny Hôs. 6:1,2)."- Hans K. LaRondelle, Deliverance in the Psalms (Berrien Springs, MI: First Impressions, 1983), tt. 180, 181. Tsara homarihina fa ny fahavononan'Andriamanitra hameka heloka, fa tsy hanafay azy, no miteraka fanajana fatratra an'Andriamanitra (Sal. 130:4; Rôm. 2:4). Ny tena fiankohofana marina dia miorina amin'ny fiaikena ny toetran'Andriamanitra be fitiavana, fa tsy noho ny tahotry ny famaizana.
Asaina miandry an'i Jehovah ireo vahoakan'Andriamanitra (Sal. 27:14; Sal. 37:34). Ny teny hebreo qawah, "miandry", dia adika ara-bakiteny hoe "manatsotra tanana", ary fototenin'ny teny hebreo ilazana ny hoe "fanantenana." Araka izany, ny fiandrasana an'Andriamanitra dia tsy fileferana amin'ny toe-javatra mahonena fa "fanatsoran-tanana" feno fanantenana na koa fiandrandrana fatratra ny fidiran'Andriamanitra an-tsehatra. Tsy ny fijery miabo ananan'ny mpanao Salamo no iorenan'ny fanantenany fa ny Tenin'Andriamanitra (Sal. 130:5). Tsy very maina ny fiandrasana an'i Jehovah satria aorian'ny alina maizina no tonga ny marainan'ny fanafahan'Andriamanitra.
Jereo ny fangatahana nataon'ilay mpanao Salamo izay tonga fangatahan'ny fiarahamonina iray manontolo (Sal. 130:7,8). Tsy afa-misaraka amin'ny fiadanan'ny vahoaka manontolo ny fiadanan'ny olona anankiray; izany no anton'ny vavaka nataony tsy ho an'ny tenany fa ho an'ny besinimaro. Amin'ny maha-mpino antsika dia ao anatin'ny fiarahamonina isika, ary izay miantraika amin'ny fiarahamonina dia misy fiantraikany amin'ny tsirairay.
Eritrereto ny fanontaniana hoe: "Raha mandinika heloka Hianao, Jehovah ô, Iza no hahajanona, Tompo ô? - Sal. 130:3. Midika inona ho anao manokana izany? Taiza ny toerana mety ho nisy anao raha toa Andriamanitra nandinika ny helokao?