Hodinihana mandritry ny herinandro: Mar. 1:16-45; Jao. 1:29-42; Mar. 5:41; Lio. 6:12; Lev. 13.
Tsianjery:
"Ary hoy Jesôsy taminy: Andeha hanaraka Ahy, fa hataoko mpanarato olona hianareo." - Mar. 1:17.
Samy mampahafantatra ny fiantombohan'ny asa fanompoana nataon'i Jesõsy S amin'ny fomba manokana ny Filazantsara tsirairay.
Atombok'i Matio amin'ny niantsoan'i Jesôsy ireo mpianatra sy ny nanaovany ny toriteny teo an-tendrombohitra ny filazantsarany.
I Lioka kosa mitantara ny tantaran'ny toriteny voalohany nataon'i Jesôsy indray Sabata tao amin'ny sinagoga iray tany Nazareta.
I Jaona indray dia mitantara ny fiantsoana ny sasany tamin'ireo mpianatra voalohany sy ny fampakaram-bady tao Kana, izay nanatanterahan'i Jesôsy ny famantarana Azy voalohany indrindra.
Ny Filazantsaran'i Marka dia mitantara ny fiantsoana ireo mpianatra efatra sy milazalaza ny amin'ny Sabata iray tany Kapernaomy ary ny toe-javatra taorian'izany.
Io "Sabata niarahana tamin'i Jesôsy" ao amin'ny fiandohan'ny filazantsaran'i Marka io no mampahafantatra sahady ny mpamaky ny momba an'i Jesôsy. Vitsy ihany ny teny nambaran'i Jesôsy voarakitra ao amin'ireo fizaran'ny lesona mandritra ity herinandro ity: ny fiantsoana fohifohy ho mpianatra, baiko nomena ny demonia, drafitra momba ny fitsidihana toerana hafa, ary ny fanasitranana boka iray narahin'ny toromarika mba hisehoany any amin'ny mpisorona ka hampadio azy. Ny asa no tena asongadina, indrindra ny fanasitranana. Tian'ity mpanoratra ny filazantsara ity ny mampiasa ny teny hoe "niaraka tamin'izay" mba hanehoana ny fihetsika tsy mitaredretra teo amin'ny asa fanompoana nataon'i Jesôsy..