"Aoka ny lahy hanao izay mety hatao amin'ny vavy; ary mba toy izany koa ny vavy amin'ny lahy." - 1 Kor. 7:3.
Mofon’aina:
Tokony ho tombontsoa sy adidy ho an'ny mpivady ny mitahiry ireo marika fifanehoam-pitiavan' izy roa manokana ho tsiambaratelony. Na rariny aza mantsy ny fifanehoam-pitiavana, dia mety hisy akony ratsy eo amin'izay mijery, na ho an'ny manam-bady na ny mpitovo. Misy ireo izay manana fomba hafa tanteraka, hafa ny nanabeazana sy ny nampianarina azy, nefa tena mifankatia amin'ny fo sy amim-pahatokiana, tahaka ireo izay zatra maneho malalaka ny fifankatiavany ihany. Ary eto ny loza: mety hisy hanao fampitahana amin'izy ireo, ka manjary hotsaraina diso sy tsy ankasitrahana ireo mpivady izay tsy mampisehoseho fa mitahiry ny fifankatiavany. (...)
Tombontsoa lehibe sy adidy masin'ny Kristianina ny manao izay hahasambatra ny vadiny, na ny andaniny na ny ankilany; saingy misy tokoa ny loza raha ny "izaho" no manjary maka ny toerana rehetra, ka lany amin'ny fifanehoan'izy roa fitiavana fotsiny ny harena sy ny fitiavana rehetra. Mamofompofona fitiavan-tena izany rehetra izany.
Tsy tokony hohidiany ao amin'izy roa irery ny soa sy ny fitiavana, fa hohararaotiny kosa ny fotoana rehetra hanaovana soa amin'ny hafa, ka hizarany ny habetsahan'ny fitiavana madio sy masina ao aminy ho an' ireo fanahy sarobidy eo imason'Andriamanitra tahaka azy ireo ihany, satria novidina tamin' ilay sorona mandrakizain'ny Zanany lahitokana. Ho an'ny maro izay miady mafy sy mahatsiaro manirery, ny teny mamy, ny fangoraham-po, ny fankasitrahana, dia toy ny rano mangatsiaka amin'ny fanahiny reraka. Mety hanamaivana ny enta-mavesatra eo an-tsoroky ny sasany koa ny torohevitra sy ny fampitandremana ary ny fananarana avy amin'ny fo nohamasinin'ny fitiavana (...). Ny teny sy ny fihetsika tsirairay maneho hatsaram-panahy sy fiheverana ireo fanahy mifanerasera amintsika dia fanehoana ny fitiavana izay nitiavan' i Jesosy ny taranak'olombelona rehetra. - L, 76, 1894.