"Amin'ny fanetren-tena rehetra sy ny fahalemem-panahy, amin'ny fahari-po mifandefitra amin'ny fitiavana." - Efes. 4:2.
Mofon’aina:
Andriamanitra dia fitiavana. Toetra mampiavaka ny mpino tsirairay ny fitiavana avy amin'Andriamanitra Ray sy ny Zanaka. Ny tenin'Andriamanitra no fantsona ikorianan'ny fitiavan'Andriamanitra ho amin'ny olona. (...) Omena ny olombelona manaiky hiara-miasa amin'Andriamanitra ny Fanahy Masina. Manova ny fisainana sy ny toetra izany, mahatonga ny olona hahay hiaritra, toy ny mahita Azy Izay tsy hita. Tsy tanteraka ny fitiavana raha tsy inoana ny fahamarinana, ary raisina ny Fanahy Masina. (...)
Nivavaka i Kristy mba ho tsapan'ny mpianany ny lanjan'ny fitiavana nasehony tamin'ny namoizany ny ainy ho an'izao tontolo izao. (...) Raha takatr'izy ireo mazava kokoa ny fitiavany feno fahafoizan-tena dia tsy ho nisy fisaraham-bazana na adilahy teo amin' izy ireo.
Miantso izay rehetra milaza ny tenany ho mino ny fahamarinana ankehitriny aho mba hiaina amin'izany fahamarinana izany. (...) Ho hitan'izao tontolo izao fa ny fitiavana asehon'ny mpino no foto-kevi-dehibe mifehy ireo mpanara-dia an'i Kristy. Mampisy firaisam-po ny fitiavan'i Kristy. Mampifanatona ny olombelona ny fahamarinana. (...) Notendren'i Kristy hitombo sy hihahery amin'ny alalan'ny firaisan-tsaina sy ny fiaraha-miasa ireo izay mino Azy. Ireo izay miasa ho an'Andriamanitra amin'ny fomba feno fiheverana ny hafa dia manamarina eo anatrehan'izao tontolo izao fa naniraka ny Zanany teto amin'ity tany ity tokoa Andriamanitra.
Na tsy mitovy aza ny talentan'ireo Kristianina mandrafitra ny fiangonana dia adidin'ny tsirairay kosa ny miasa. Samy hafa ny talenta, kanefa samy nomena asa hataony ny tsirairay. Samy miankina amin'i Kristy izy rehetra. Izy no Loha be voninahitra mampiray ny olona rehetra, na inona na inona toerana tanany eo amin'ny fiarahamonina, na inona na inona sarangany, amin'ny alalan'ny finoana ny Tenin'Andriamanitra. (...) Tokony hisaintsaina ny fitiavany ireo mpanara-dia Azy. Tokony handroso hatrany amin'ny fanatrarana ny fenitra napetraka eo anoloany izy ireo. Raha iainana ny foto-kevitra kristianina dia hahatonga firindrana sy fiadanana tanteraka manerana izao tontolo izao. —UL, t. 104.