"Izay tsy mbola hitan'ny maso ary tsy mbola ren'ny sofina, na niditra tao am-pon'ny olona, na inona na inona no efa namboarin 'Andriamanitra ho an 'izay tia Azy." 1 Kôr. 2:9.
Mofon’aina:
Misy asa lehibe miandry antsika. Mila finoana lehibe kokoa an'i Kristy sy ny Ray isika satria tsy maintsy ananantsika io, raha tsy izany dia hatao ho isan'ny tsy mpino isika. Be ny fotoana fanararaotra, ary be tokoa ny asa hotanterahina. Mila ny fanamasinan'ny Fanahy Masina isika. (...) Ny fanamasinana avy amin'ny fahamarinana, izay hampiorina mafy ny olona amin'ny finoana, dia hahatonga ny olona ho mpiara-miasa amin'Andriamanitra.
Manjary iray amin'i Kristy izy ireo, rehefa miray amin'Ilay Loharanon'ny hery rehetra eo am-pitozoany amin'ny fanatanterahana ny adidy, eo am-panitarany ny fahalalany ny fitiavan'Andriamanitra ao amin'i Kristy Jesôsy, mandra-pahatanteraka azy ireo miaraka amin'i Kristy ao amin'Andriamanitra.
Tsy hay lazaina ny voninahitra miandry ireo mpandresy mahatoky. (...) Hisandrahaka tahaka ny sedera izy ireo, ary azo antoka fa hitombo ny fahalalany. Ary isaky ny dingana iray handrosoany amin'ny fahalalana dia ho hitany fa lavitra tanteraka amin'izay nantenainy ny zava-misy marina.
"Izay tsy mbola hitan'ny maso ary tsy mbola ren'ny sofina, na niditra tao am-pon'ny olona, na inona na inona no efa namboarin'Andriamanitra ho an 'izay tia Azy. " - 1 Kôr. 2:9. Ny asantsika ankehitriny dia ny miomana ho amin'ireo fitoerana izay amboarin'Andriamanitra ho an'izay tia Azy ka mitandrina ny didiny (...). Hohalalahin'ny Tompo Jesôsy ny saina sy ny fo tsirairay mba handraisany ny Fanahy Masina. (...)
Inona ny fiomanana efa ataonao hiatrehana ny hoavy? (...) Zavatra lehibe sy tsara lavitra noho izay ataonao ankehitriny no ilainao. Amin'ny fanaovanao ny tsara dia misy hery miasa mangina avy aminao, na fantatr'olona izany na tsia. Amin'ny maha-olony anao, dia mendrika ny tsara kokoa avy aminao Andriamanitra, mihoatra noho izay efa nomenao Azy. Saino tsara izao: eo ambany fanevan'ny Mpanjaka Imanoela ve ianao sa eo ambany faneva maintin'ny mpanjakan'izao fahamaizinana izao? Manana adidy ianao hampiasa ny fahefana sy hamerina ny vola nampindramin'ny Tompo anao, ho fampandrosoana ny asany sy hanomezam-boninahitra ny anarany. — UL, t. 151.