"Fa ny làlan'ny marina dia toy ny fipoak 'andro maraina, izay mihamazava mandra-pitataovovonan'ny andro." -Ohab. 4:18.
Mofon’aina:
Ny fitiavan'i Kristy ao am-po, mampiseho ny heriny mahagaga eo amin'ny fiainana — io no fahagagana lehibe indrindra natao teo anatrehan' izao tontolo izao lavo sy feno adilahy. Andeha isika hiezaka hanatanteraka izany fahagagana izany, tsy amin'ny herin'ny tenantsika fa amin'ny anaran'i Jesôsy Kristy Tompontsika sy tompointsika. Andeha isika hitafy an'i Kristy, dia hiseho mazava ny hery mahagagan'ny fahasoavany eo amin'ny fiovan-toetra, hany ka ho resy lahatra izao tontolo izao fa naniraka ny Zanany teto amin'izao tontolo izao Andriamanitra mba hahatonga ny olona ho tahaka ny anjely masina eo amin'ny toetrany sy ny fiainany. (...)
Aoka hekentsika ny hitondra ny marika maha-Kristianina. Tsy marika hita maso ety ivelany izany, tsy fitondrana hazo fijaliana na fanaovana satroboninahitra, fa fanehoana ny firaisan' olombelona amin'Andriamanitra. Aoka hariantsika ny toetra taloha mbamin'ny asany, ka hotafiantsika ny toetra vaovao, izay havaozina ho amin'ny fahalalana tsara araka ny endrik'Ilay nahary antsika (Kôl. 3:9,10). Miseho ny fihaingoana masina rehefa mifanatona ny Kristianina ka mifandray am-po amin'ny fitiavana tahaka ny an'i Kristy.
"Koa amin 'izany, ry rahalahy, satria manana fahatokiana hiditra ao amin'ny fitoerana masina isika noho ny ran'i Jesôsy , (...) sady manana Mpisorona lehibe mitandrina ny tranon 'Andriamanitra, dia aoka isika hanatona amin 'ny fo marina sy amin 'ny fahatokiana be avy amin'ny finoana (...); ary aoka isika hifampandinika hampandroso ny fitiavana sy ny asa tsara; aza mahafoy ny fiarahantsika miangona, tahaka ny fanaon'ny sasany, fa mifananara kosa, mainka satria hitanareo fa mihantomotra ny andro. " Heb. 10:19-25.
Tokana ihany ny fivavahana marina, tokana ny làlana mankany an-danitra, fahazavana tokana no manazava ny lalan'ny mpivahiny. Eo am-pandrosoantsika ho amin'ny fahalalana ny Tompo no hanekentsika isaky ny indray mandingana fa i Kristy no Fahazavan'izao tontolo izao, Ilay lalana sy fahamarinana ary fiainana; ary ho hitantsika fa ny làlana asainy izorantsika dia "toy ny fipoak 'andro maraina, izay mihamazava mandra-pitataovovonan 'ny andro." — Ohab. 4:18.
Lehibe Jehôvah ka mendrika ny hoderaina indrindra (...). Sambatra, tena sambatra ny tokantrano izay misy ray sy reny ary zanaka manompo an'i Kristy. — UL, t. 233.