"Ary Jesôsy nitombo saina sy tena sady nandroso fitia tamin 'Andriamanitra sy ny olona." - Lio. 2:52
Mofon'aina:
Efa lavo ny olombelona. (...) Simban'ny fironany izy ary nihena ny heriny noho ny tsy fankatoavany, ka manjary tsy misy azony antenaina afa-tsy fahoriana sy fahatezerana mirehitra. Nanoritra lalana hialana amin'izany anefa Andriamanitra (...) ary hoy Izy amin'ny olona rehetra: "Koa amin'izany aoka ho tanteraka hianareo." (...)
I Kristy no Môdelintsika. Tonga teto an-tany Izy, ary nandalo tamin'ireo dingana samy hafa amin'ny fanandraman'ny olombelona. Tsy nisy toerana ho an'ny fahotana teo amin'ny fiainany. Izao no ambaran'ny Tenin'Andriamanitra momba Azy: "Ary ny Zaza nitombo ka nihahery sady feno fahendrena; ary ny fahasoavan 'Andriamanitra no tao aminy." - Lio. 2:40. (...)
Tsy niaina mba hanao izay mahafinaritra ny Tenany ny Mpamonjy. (...) Niatrika fizahan-toetra sy fakam-panahy isan'andro Izy, nefa tsy mba resy na kivy. Nanam-paharetana sy fifaliana mandrakariva Izy, ary ireo ory dia niarahaba Azy toy ny mpitondra hafatra mitory fiainana sy fiadanana ary fahasalamana. (...)
Izao no teny fikasan'Andriamanitra: "Ho masina hianareo, satria masina Aho." Fanehoana taratra ny voninahitr 'Andriamanitra ny fahamasinana. Tsy maintsy miara-miasa amin'Andriamanitra anefa isika mba hanehoantsika taratra izany voninahitra izany. Tsy maintsy esorina tsy ho ao am-po sy ao an-tsaina izay rehetra mitarika: ho amin'ny ratsy. Tsy maintsy mamaky sy mianatra ny Tenin'Andriamanitra amin'ny faniriana lalina ny hahazo hery ara-panahy avy amin'izany isika. (...) Ny fanamasinana antsika no tanjon'Andriamanitra ao amin'izay ataony amintsika rehetra. Hatry ny fahagola no nifidianany antsika mba ho masina isika. Hoy i Kristy: "Fa izao no sitrapon 'Andriamanitra, dia ny hanamasinana anareo ." -1 Tes. 4:3. Moa ve sitraponao koa ny hampifanarahana ny fanirianao sy ny fironanao amin'ny sitrapon' Andriamanitra? (...)
Ny fiainana ny fiainan'ny Mpamonjy, ny fandresena ny faniriana feno fitiavan-tena, ny fanatanterahana amin-kerim-po sy amim-pifaliana ny adidintsika amin'Andriamanitra sy ireo manodidina antsika - izany no mahatonga antsika hihoatra noho ny mpandresy. Izany no manomana antsika mba hijoro eo anoloan'ilay seza fiandrianana fotsy lehibe tsy hisy pentina na fiketronana (...).- RC, t. 37.