"Fa Kristy tsy mba niditra tao amin 'izay fitoerana masina nataon-tànana, izay tandindon 'ny tena fitoerana masina, fa ho any an-danitra tokoa, mba hiseho eo anatrehan 'Andriamanitra ankehitriny ho antsika." - Heb. 9:24
Mofon'aina:
I Kristy no fanatitra ho antsika, Solontsika, Antoka ho antsika ary Mpanelanelana ho antsika any an-danitra; natao ho fahamarinana sy fahamasinana ary fanavotana ho antsika Izy. (...) Ny fanelanelanana ataon'i Kristy ho antsika dia fanehoana ireo fahamendrehany amin'ny maha-Andriamanitra Azy (...); Fa efa niakatra ho any an-danitra Izy mba hanao asa fanavotana noho ny fandikantsika lalàna. (...) "Koa amin'izany dia mahavonjy tokoa izay manatona an 'Andriamanitra amin'ny alalany Izy, satria velona mandrakizay hanao fifonana ho azy. " - Heb. 7:25. (...) Tsy sitrapon'Andriamanitra ny hisalasalanao sy hampahorinao ny fanahinao amin'ny tahotra fandrao tsy handray anao Andriamanitra noho ny maha-mpanota sy tsy mendrika anao. (...) Ento eo anatrehany ny raharahanao ka takio amin'izany ny fahamendrehan'ilay ra izay nalatsaka ho anao teo amin'ny hazo fijalian'i Kalvary. Hiampanga anao ho mpanota raindahiny i Satana, ary tsy maintsy hiaiky izany ianao, kanefa azonao atao ny milaza hoe: "Fantatro tokoa fa mpanota aho, ary izany indrindra no ilako Mpamonjy. Tonga teto amin'ity tany ity i Jesôsy mba hamonjy ny mpanota. (...) Tsy manana fahatsarana na fahamendrehana hahafahako mitaky ny famonjena aho, kanefa entiko eo anatrehan'Andriamanitra ilay ra mahavotra an'Ilay Zanak' ondrin ' Andriamanitra ( ) izay mahaisotra ny fahotan'izao tontolo izao. Izany no hany fiarovan-tenako. (...)" Ny fahamarinan'i Kristy no mahatonga ny mpanota mibebaka ho azo ekena eo anatrehan'Andriamanitra, ary koa miasa ho fanamarinana azy. Na feno fahotana toy ny ahoana aza ny fiainany, raha mino an'i Jesôsy ho Mpamonjy ny tenany manokana Izy, dia mijoro eo anatrehan'Andriamanitra amin'ny fitafiana tsy misy pentin'ny fahamarinana izay atafin'i Kristy azy. (...) Amin'ny finoana no ahitany fa i Jesôsy no Mpamonjy azy, (...) ary mahavonjy tokoa "izay manatona an 'Andriamanitra amin'ny alalany." Mahita ny sakany sy ny lavany, ny haavony sy ny halalin'ny fahombiazana ny mpino ao amin'ny fanavotana atao ho azy (...); novidina tamin'ny sanda tsy misy fetra izy, ary fisaorana sy fiderana no mameno ny fanahiny. RC, t. 75.