"Matokia an 'i Jehôvah amin'ny fonao rehetra, fa aza miankina amin'ny fahalalanao." - Ohab. 3:5
Mofon'aina:
Raha milaza ny amin'ny hoe finoana isika dia misy famarafarana tokony hotsaroana. Misy izay inoan'ny saina nefa samy hafa mihitsy amin'izay atao hoe finoana. Na dia i Satana sy ny miaramilany aza dia tsy mahazo mandà velively akory ny fisian'Andriamanitra sy ny heriny ary ny fahamarinan'ny teniny. Lazain'ny Baiboly fa `ny demonia koa mba mino izany ka dia mangovitra' - Jak. 2:19, nefa tsy finoana izany. Ny tena finoana dia tsy finoana fotsiny ny tenin'Andriamanitra fa fanoavana ny sitrapony sy fanolorana ny fo ho Azy ary fanompanana ny fitiavana Aminy (...).
Misy olona izay efa nahalala ny fitiavan'i Kristy mamela heloka sady naniry marina tokoa ny ho tonga zanak'Andriamanitra, nefa tsaroany fa tsy mendrika ny fitondran-tenany, be tsiny ny toe-piainany, ka dia misalasala izy raha efa nohavaozin'ny Fanahy Masina ny fony na tsia. Amin'ny olona toy ireny dia hoy aho hoe: Aza mihemotra amin'ny famoizam-po. Tsy maintsy hiankohoka sy hitomany matetika eo an-tongotr'i Jesôsy isikanoho ny tsy fahombiazana sy ny fahadisoantsika nefa tsy tokony ho kivy. Ary na dia hoe resin'ny devoly aza isika dia tsy ariana, na afoy, na lavin'Andriamanitra. Sanatria! Eo an-tanana ankavanan'Andriamanitra i Kristy manao fifonana ho antsika. (...)
Ary aza hadinoina koa ny tenin'i Kristy manao hoe: 'Fa ny Ray dia tia anareo.' - Jao. 16:27. Maniry anao ho tafaverina eo aminy Izy mba hahitany ny fahadiovana sy ny fahamasinan'ny tenany mitaratra eo aminao. (...) Mivavaha amin-kafanam-po bebe kokoa ary minoa amin-toky misimisy kokoa. (...)
(...) Ny fahalalantsika ny faharatsiantsika no manesika antsika hankeo amin'Ilay mahavela heloka. Ary raha ny fanahy izay mahatsiaro tsy fahombiazana no mitady an' i Kristy dia hiseho amin-kery amin'izany fanahy izany Izy. Arakaraka ny fanesiky ny fahantrantsika ho eo Aminy sy ho eo amin'ny Tenin'Andriamanitra no hiderantsika ny Toetrany sy hanahafantsika kokoa ny Endriny. -RC, t. 123.