Vakio ny Sal, 40:1; Sal. 50:15; Sal. 55:22; ary ny Sal. 121. Amin'ny fomba ahoana no Idiran'Andriamanitra amin'ny fiainantsika andavanandro?
Ao amin'ny Soratra Masina dia maneho ny Tenany ho llay Andriamanitra velona miasa ho an'ireo izay miantso Azy i Jehovah. "Eo anatrehako mandrakariva Jehovah" - Sal. 16:8, hoy ny mpanao Salamo. Noho izany dia matoky an'Andriamanitra sy miantso Azy izy (Sal. 7:1; Sal. 9:10). Handre azy ny Tompo na dia avy ao "amin'ny lalina" aza no iantsoany Azy (Sal. 130:1,2); izany hoe, tsy misy afa-miala tsy ho eo ambanin'ny fanapahan'Andriamanitra ny toe-javatra rehetra eo amin'ny fiainana. Araka izany, ny antsoantson'ny mpanao Salamo, na antsom-pahoriana toy inona aza izany, dia ombam-panantenana mandrakariva.
Ny Sal. 121 indray dia manasongadina ny herin'Andriamanitra Mpahary eo amin'ny fiainan'ireo mahatoky manokana. Miseho araka izao manaraka izao izany hery izany:
(1) "Tsy mba havelany hangozohozo anie ny tongotrao" - Sal. 121:3. Matetika entina ilazana ny dian'ny olona eo amin'ny fiainany ny hoe "tongotra" (Sal. 66:9; Sal. 119:105; Ohab. 3:23). Ny teny hebreo nilazana ny hoe "tsy (...) hangozohozo" dia manambara ny fiarovana omen'Andriamanitra izao tontolo izao (Sal. 93:1) sy an'i Ziona (Sal. 125:1).
(2) Ny fanehoana an'i Jehovah ho Mpiambina ny Isiraely (DIEM), Izay tsy matory na rendrehana, dia manasongadina ny fahavononan'Andriamanitra mandrakariva hiditra an-tsehatra ho an'ny zanany (Sal. 121:3,4).
(3) Ny hoe "Jehovah no fialofanao"- Sal. 121:5,6 dia mampahatsiahy ny andry rahona tamin'ny andron'ny Fahafahana ao amin'ny Eksôdôsy (Eks. 13:21,22). Toy ny tamin'izany dia manome fialofana ara-bakiteny sy ara-panahy ho an'ny vahoakany ny Tompo.
(4) Eo amin'ny ankavanan'izy ireo Andriamanitra (Sal. 121:5). Ny tanana havanana dia entina anehoana ny tanana matanjaka indrindra, ny tanana miasa (Sal. 74:11; Sal. 89:13). Eto dia manambara ny fahakekezan'Andriamanitra sy ny fanampiany izany (Sal. 16:8; Sal. 109:31; Sal. 110:5).
(5) Hamafisina mazava ao amin'ny Sal. 121:6-8 ny fiarovan'Andriamanitra ny olony. Hiaro ny zanany amin'ny ratsy rehetra Andriamanitra. Na ny "masoandro" na ny "volana" dia tsy hamely azy ireo. Hiaro azy ireo Andriamanitra "na mivoaka na miditra". Ny fiahian'Andriamanitra antsika tsy an-kiato amin'ny lafiny rehetra no asehon'ireo fomba fiteny kanto ireo.
Ahoana no mety hahafahanao mahatsapa kokoa ny maha-zava-misy ny fiahian'Andriamanitra eo amin'ny fiainanao isan'andro? Ahoana no hahaizanao miara-miasa tsara kokoa amin'Andriamanitra mba hamelanao Azy hiasa ao anatinao sy amin'ny alalanao?