"Fa amin'izany dia hirarvoravo amin'ny Tsitoha hianao ka hanandratra ny tavanao amin'Andriamanitra. Raha mifona aminy hianao, dia hihaino anao Izy; ary ny voadinao dia hefainao." - Joba 22:26,27.
Mofon’aina:
Hoy i Kristy rehefa nivavaka ho an'ny mpianany: "Ho an'ireto no anamasinako ny tenako, mba hanamasinan'ny fahamarinanao azy. Nefa tsy ho an'ireto ihany no angatahako, fa ho an'izay mino Ahy koa noho ny teniny" – Jao. 17:19,20. Nampidirin'i Kristy tao anatin'ny vavaka nataony ireo rehetra izay hihaino ny tenin'ny fiainana sy famonjena avy amin'ireo mpitondra hafatra nirahiny. (…)
Takatsika amin'ny alalan'ny finoana ve fa malalan'Andriamanitra Ray isika, toy ny itiavany ny Zanany Lahitokana? Raha takatsika izany ka miasa isika ho setrin'izany, dia haidina ao amin'ny fanahintsika mahantra sy mangetaheta ary karankaina ny fahasoavan'i Kristy, dia ny diloilo volamena avy any an-danitra. Tsy hiovaova na hitsilopilopy intsony ny fahazavantsika, fa hamirapiratra mazava ao anatin'ny haizina ara-pitondran-tena, izay toa lambam-paty manarona izao tontolo izao. Tokony ho rentsika amin'ny alalan'ny finoana ny fanelanelanana amin-kery izay ataon'i Kristy tsy tapaka ho antsika hoe: "Ray ô tiako mba ho any amiko amin'izay itoerako ireo izay nomenao Ahy, mba hahita ny voninahitro nomenao Ahy izy; fa efa tia Ahy Hianao, fony .tsy mbola ary ny fanorenan'izao tontolo izao." Jao. 17:24 ( ...)
Mandrisika antsika hanao fangatahana tsy tapaka ny Mpanavotra antsika. Manome toky azo antoka ho antsika Izy fa tsy ho foana ny fivavahantsika. Hoy Izy: "Mangataha, dia homena hianareo; mitadiava, dia hahita hianareo; dondony, dia hovohana hianareo. Fa izay rehetra mangataka no mahazo; ary izay mitady no mahita; ary izay mandondona no hovohana." – Lio. 11:9.
Avy eo dia ataony sary an'ohatra ny ankizy iray mangataka mofo amin-drainy, ka asehony ny fihoaran'ny fanirian'Andriamanitra hanome izay angatahintsika raha miolotra amin'ny fanirian'ny ray aman-dreny eto an-tany hanome izay angatahin-janany. (...)
Azontsika hatonina izao ankehitriny izao ny Mpamonjintsika sarobidy. Ao Aminy no iorenan'ny fanantenantsika ny fiainana mandrakizay. Izy no mitondra ny fangatahantsika amin' Andriamanitra Ray sy mampita amin-tsika ny fitahiana nangatahintsika. —ST, 18 Jona 1896.