"Ary mba hampahiratina ny mason'ny sainareo, mba ho fantatrareo izay fanantenana avy amin'ny fiantsoany sy izay haren'ny voninahitry ny lovany eo amin'ny olona masina." — Efes. 1:18.
Mofon’aina:
Ny fahalalana an'Andriamanitra no loharanon'ny fahalalana sy ny fivelarana marina rehetra. Afa-tsy eo amin'izay harafesenin'ny fahotana ihany, na aiza na aiza andehanantsika na itoerantsika (...) dia efa naseho izany fahalalana izany. Na inona na inona lalam-pandalinana arahintsika, raha miaraka amin'ny faniriana madio hikatsaka ny fahamarinana, dia ho voatarika ho eo amin'ilay tsy hita maso, ilay fahendrena tsitoha izay miasa eo amin'ny zavatra rehetra sy amin'ny alalan'izany isika. (...) Manoatra lavitra noho izay mety ho tratry ny sain'ny olona ny vokatry ny firaisana toy izany eo amin'ny tena sy ny saina ary ny fanahy. (...)
Izao no hafany ho an' ny taranak' olombelona: "Mifankazara amin'ny tsitoha hianao" - Jôba 22:21. Ny fomba fiasa avy amin'ireo teny ireo no nampiharina tamin'ny fanabeazana ilay razamben'ny olombelona. (...)
Raha avy teo am-pelatanan' Andriamanitra i Adama dia nanam-pitoviana tamin'Ilay Mpanao azy (...). "Andriamanitra nahary ny olona tahaka ny endriny" — Gen. 1:27, ary fikasany ny hanehoan'izy ireo ny voninahitr 'Ilay Mpahary sy izany endrika izany amin'ny fahafenoany kokoa hatrany, araka ny halavan'ny andro iainany. Nanana fahafahana mivoatra avokoa ireo fahaiza-manaony rehetra (...). Midadasika tokoa ny sehatra nahazoan'izy ireo nampiasa ny heriny sy ny fahaizany, be voninahitra ny saha nomena hanaovany fikarohana. Ireo zava-miafin'ny tontolo hita maso - "ny fahagagana avon'llay tanteraka amin'ny fahalalana" - Jôba 37:16, dia nanintona ny olona handalina izany. (…)
Noho ny tsy fankatoavany anefa dia tsy nomena izany. Nitotongana ny fitoviana amin'Andriamanitra noho ny fahotana, zary levona mihitsy aza izany. Nihanalemy ny hery ara-batan'ny olombelona, nihena ny hery ara-tsaina, ary nanjavona ny fahiratana ara-panahy. (...) Na izany aza anefa dia tsy navela tsy hanana fanantenana ny taranak'olombelona. Tamin'ny alalan' ilay fitiavana sy ny famindram-po tsy misy fetra no nanaovana ny drafi-pamonjena, ka nanomezana ny androm-pahasoavana. Mba hamerenana indray ilay endriky ny Mpamorona izay very eo amin'ny olombelona (...) dia notanterahina ity drafitra avy any an-danitra ity. Izany no tsy maintsy ho asan'ny fanavotana sy tanjon'ny fanabeazana ary antony lehibe eo amin'ny fiainana. — Fk, 8-10.