Hodinihina mandritra ny herinandro: Sal. 33:5; Sal. 85:10; Deo. 32:4; Jak. 1:17; Tit. 1:2; Eks. 32:14; Mat. 5:43-48.
Tsianjery:
"Fa izay te-hirehareha dia aoka hirehareha amin'izao: dia ny fahendreny sy ny fahalalany Ahy ho Jehôvah , Izay manao famindrampo sy fitsarana marina ary fahamarinana ety ambonin'ny tany; fa izany no sitrako, hoy Jehôvah ." - Jer. 9:23.
Tsy hoe miovaova sy ratsy fanahy fotsiny ireo "andriamanitra" nivavahan'ny firenena hafa fa nibaiko ny hanaovana zava-mahatsiravina tahaka ny fanaovana sorona zazakely izy ireo. Teo anatrehan'izany anefa dia tsy afaka niandrandra ny fankasitrahan'ireo andriamanitra ireo akory ireo vahoaka mpanompo sampy ary tsy sahy nanao izay hampahatezitra ireo andriamanitry ny fireneny.
Ambaran'ny Deo. 32:17 fa ny demonia no ao ambadik'ireny "andriamanitra" ireny (jereo koa ny 1 Kôr. 10:20,21). Nahazo vahana tao anatin'ny fivavahan'izy ireo ny fanararaotana ka nanjary latsaka tao anatin'ny haizina ara-panahy sy ara-pitondrantena ny olona.
Samy hafa amin'ireo herin'ny demonia ireo kosa ilay Andriamanitry ny Baiboly. Andriamanitra tsara Izy ary tsy miovaova ny toetrany. Ary izany fahatsarany tsy miova izany indrindra no ananantsika fanantenana ankehitriny sy ho mandrakizay.
Mifanohitra tanteraka amin'ireo andriamani-tsy izy tamin'ny andro fahiny, eny ireo andriamanitra "môderna" amin'izao andro izao koa aza, i Jehôvah , satria manohina Azy fatratra ny faharatsiana sy ny fijaliana, ary ny tsy rariny sy ny fampahoriana -zavatra - izay melohiny mandrakariva sy melohiny tanteraka ireo. Ary izao no zava-dehibe indrindra: hofoanany tsy hisy intsony ireo rehetra ireo indray andro any.
*Famerenana ny lesona ny sabata 08 Febroary.