"Fa efa tonga mpiombona amin’i Kristy isika, raha mihazona mafy ny fiandohan'ny fahatokiantsika hatramin'ny farany." - Heb. 3:14.
Mofon’aina:
Ary ny anjely, ilay efa hitako, dia nitsangana teo ambonin'ny ranomasina sy teo ambonin'ny tany, ka nanangana ny tanany ankavanana ho amin'ny lanitra ary nianiana tamin’zay velona mandrakizay mandrakizay, dia Ilay nahary ny lanitra sy ny ao aminy ary ny tany sy ny ao aminy ary ny ranomasina sy ny ao aminy fa tsy hisy andro intsony." - Apôk. 10:5,6. Manambara ny fiafaran'ireo vanim-potoana ara-paminaniana io hafatra io. Nangidy tokoa ny fahadisoam-panantenana ho an'ireo niandry ny hahita ny Tompontsika tamin'ny 1844, dia ireo izay niandrandra fatratra ny fisehoany. Drafitr'Andriamanitra mihitsy ny nisehoan'io fahadisoam-panantenana io mba hanehoana marina izay tao am-pon'ny maro.
Tsy misy singan-drahona iray nianjera tamin'izany ka tsy nanomanany azy; tsy nisy hery nitsanga-kanohitra ny asany ka tsy efa hitany mialoha. (...) To ny fikasany rehetra. Mifamatotra amin'ny seza fiandrianany ny lalàny ka tsy misy herin'ny ratsy maharava izany. Andriamanitra no manainga sy miaro ny fahamarinana; ary handresy ny fanoherana rehetra izany.
Ny lalàna aseho eo amin'ny toetra no filazantsaran'i Kristy. Ny famitahana atao hanoherana izany, ny paikady rehetra hiarovana ny sandoka, ny fahadisoana rehetra volavolain'ireo mpiasan'i Satana, dia ho montsamontsana mandrakizay, ary hiseho tahaka ny masoandro amin'ny mitataovovonana ny fandresen'ny fahamarinana. Hamirapiratra miaraka amin'ny fanasitranana eo amin'ny elany ilay Masoandron'ny Fahamarinana, ary ho feno ny voninahiny ny tany rehetra. (…)
Ho velona indray ireo fifandirana nisy tany aloha, ary hisy hatrany ireo fampianarana vaovao. Nefa ireo vahoakan'Andriamanitra izay efa nanao ny anjarany tamin'ny fitoriana ny hafatry ny anjely voalohany sy faharoa ary fahatelo, noho ny finoany sy ho fanatanterahana ny faminaniana, dia mahalala ny laharana tokony hisy azy. Sarobidy lavitra noho ny tena volamena ny fanandramana Tainan' izy ireo. Tokony hijoro tsy azo hozongozonina tahaka ny vatolampy izy ireo, hihazona mafy ny fitokiany hatramin'ny farany. - S1M, b. 2, tt. 108,109.