"Isika tsy maintsy manao ny asan'Izay naniraka Ahy, raha mbola antoandro; avy ny alina, ka tsy mahazo miasa ny olona." - Jao. 9:4.
Mofon’aina:
Nomen'i Kristy asa tokony hataony ny olombelona rehetra, ary tokony hanaiky ny fahendren'ny drafitra nataony ho antsika amin'ny alalan'ny fiaraha-miasa Aminy amin-kafanam-po isika. Ao amin'ny fiainam-panompoana irery ihany no ahitana fifaliana tena izy. Fadiranovana tokoa ireo izay manana fiainana tsy misy antony sy feno fitiavan-tena. Tsy afa-po amin'ny tenany sy amin'ny hafa izy.
Ny mpiasa marina sy tsy tia tena ary feno fanoloran-tena dia mampiasa amim-pifaliana ny fanomezana ambony indrindra nomena azy amin'ny fanompoana ambany indrindra. Tsapany fa ny tena fanompoana dia midika ho fahitana ireo adidy asain' Andriamanitra ataontsika sy ny fanatanterahana izany.
Maro no tsy faly amin'ny asa izay nomen' Andriamanitra hataony. Tsy mahafa-po azy ireo ny manompo Azy amim-pifaliana eo amin'ny toerana notendreny hiasany, na ny manatanteraka tsy amim-pimonomononana ny asa nampiandraiketina azy.
Tsy mahadiso antsika ny maneho tsy fahafaham-po eo anatrehan'ny fomba anatanterahantsika ny adidy, saingy tsy tokony haneho tsy fifaliana. eo anatrehan'izany adidy izany isika noho ny faniriantsika hanao zavatra hafa eo amin'ny toeran'izany. Noho ny fahatsaran'Andriamanitra, dia napetrany eo anoloan'ny olombelona ny fanompoana izay ho fanasitranana ho an'ny fanahiny marary. Amin'izany no itarihany azy ireo hamela ireo fironana feno fitiavan-tena ao anatiny, izay raha ankamamiany dia hanaisotra aminy ny asa tokony homen'Andriamanitra azy. Raha manaiky sy manatanteraka izany fanompoana izany izy ireo dia ho sitrana ny fanahiny. Raha mandà kosa izy, dia miady amin'ny tenany sy amin'ny hafa.
Mametraka fitsipi-pifehezana ho an'ny mpiasany ny Tompo, mba hahatonga azy ireo ho vonona handray ny toerana notendreny ho azy. Iriny ny hamolavola ny fisainan'izy ireo hifanaraka amin'ny sitrapony. Noho izany indrindra no amelany azy ireo hozahan-toetra sy handalo fitsapana. Apetrany eo amin'ny toerana hiarovana azy tsy ho tratry ny fandriky ny baranahiny sy ny fahakamoana ny sasany; any no ampianarana ireny mpiasa ireny hahafantatra ny tombambidin'ny fotoana ka hampiasa izany amin'ny fomba tsara sy feno fahendrena indrindra. - MR 8: 422, 423.