"Fa ny fanjakan'ny lanitra dia tahaka ny olona izay efa handeha ho any an-tany hafa ka niantso ny mpanompony, dia nanolotra azy ny fananany; koa ny anankiray nomeny talenta dimy, ny anankiray roa, ary ny anankiray iray - samy araka izay fahaizany avy; dia lasa nandeha izy." - Mat. 25:14,15.
Mofon’aina:
Aoka tsy hiandry ny fanosorana ireo mpitandrina ny famitana ny asa tokony hatao. Raha toa tsy misy mpitandrina afaka hanatontosa ny asa, aoka ny lehilahy sy ny vehivavy manam-pahalalana, izay tsy mieritreritra momba ny fomba hanangonany harena betsaka indrindra, honina any amin'ireny tanàna sy vohitra ireny ka hanandratra ny fanevan'ny hazo fijaliana, amin'ny fampiasana ny fahalalana efa azony ho famaboana fanahy ho an'ny fahamarinana.
(...) Na dia ny talenta iray izay nankinin'ny Tompo aza dia tokony hampiasaina amim-pahatokiana mba hahazoana talenta hafa. Aiza ireo lehilahy sy vehivavy novelombelomin'ny reniranom-pitahiana izay nikoriana avy eo amin'ny seza fiandrianan'Andriamanitra? Aoka izy ireo hanontany tena ny amin'izay nataony mba hampitana izany fahazavana izany amin'izay tsy nanana ny tombontsoa nananany. Ahoana no hataon' ireo izay nanao an-tsirambina ny fampiasana ny talentany rehefa hijoro eo amin'ny fitsarana (...)? Nanankina talenta tamin'ny mpanompony tsirairay ilay Tompo avy any an-danitra. "(...) ny anankiray nomeny talenta dimy, ny anankiray roa, ary ny anankiray iray -samy araka izay fahaizany avy." - Mat. 25:15.
Tsy olom-bitsy notsongaina ihany no nomen'Andriamanitra talenta fa ny olon-drehetra (...). Maro tamin' ireo izay nomen'Andriamanitra talenta no nandà tsy hampiasa ireny ho fampandrosoana ny fanjakan'Andriamanitra; hampamoa-hin'Andriamanitra ny amin'ny fomba nampiasany ny fanomezany anefa izy ireny. Ny olon-drehetra, na ny manompo an'Andriamanitra na ny manao izay mahafinaritra ny tenany, dia nanankinana fananana, ka ny fampiasana izany araka ny tokony ho izy dia hanome voninahitra an'Andriamanitra ary ny fampiasana izany tsy araka ny tokony ho izy kosa dia fandrobana ny Mpanome. Tsy manaisotra ny fahamelohan'ireo izay nomena ny talenta ny tsy fahatakarany ny zon'Andriamanitra hitaky izany aminy. Raha misafidy ny hilahatra eo ambany faneva maintin'ilay andrian'ny haizina izy amin'izao fiainana izao, dia handà azy i Kristy amin'ny andro farany izay hampamoahana azy. - ST, 23 Janoary 1893.