"Ary niaraka tamin'izay dia lasa ilay nandray ny talenta dimy, ka nataony varotra izany; ary nahazo tombony talenta dimy koa izy? Ary toy izany koa, ilay nandray ny roa dia nahazo roa ho tombony." - Mat. 25:16,17.
Mofon’aina:
Efa naloa ny sanda hanavotana ny zanakalahy sy ny zanakavavin'i Adama rehetra, ary ny tsy fetezan'ireo efa navotana tamin'ny ra sarobidin'i Kristy hitoetra ho mahatoky Aminy dia hahatonga azy ireo tsy ho voaro amin'ny fitsarana ho avy aminy amin'ny andro farany. Tsy maintsy hampamoahina ny amin'ny tsirambina nataony teo amin'ny fampiasana ny talenta nankinin'ny Tompo taminy izy ireo. (...)
Mpiasa tompon'andraikitra maro no mandrafitra ny fianakaviamben'ny taranak' olombelona, hatramin' ireo ambony sy manan-talenta indrindra ka hatramin'ireo ambany sy tsotra indrindra; izy rehetra dia samy notolorana ireo fanomezan'ny lanitra. Fanomezana nankinin'Andriamanitra tamintsika ny fotoana ka tokony hampiasaina amim-pitandremana ho amin'ny fanompoana an'i Kristy. Fanomezan'Andriamanitra ny hery miasa mangina ka tokony hampiasaina ho fampandrosoana ny tanjona ambony sy manan-danja indrindra. Maty teo amin'ny hazo fijalian' i Kalvary i Kristy mba hahafahantsika mampiasa ny hery miasa mangina rehetra ananantsika ho fanandratana Azy eo anoloan'izao tontolo izao efa ho faty. (...)
Talenta avy amin'Andriamanitra ny faharanitan-tsaina. Ny firaisam-po sy ny fitiavana dia talenta natao harovana amim-pahamasinana sy hatsaraina, mba hahafahantsika manompo an'Ilay nividy antsika ho fananany.
An' Andriamanitra ny momba antsika sy izay mety ho toetsika rehetra. Tokony hampiasaina ho Azy ny fanabeazana sy ny fitsipi-pifehezana ary ny fahaiza-manao amin'ny lafin-javatra rehetra. (...) Na kely na be ny talenta nampiandraiketina, dia takin'ny Tompo ny hanomezan'ireo mpitantam-pananana ny tsara indrindra. Tsy ny habetsaky ny fananany nankinina na ny fampitomboana natao tamin'izany no mahatonga ny lehilahy sy ny vehivavy hankasitrahan'ny lanitra, fa ny fahatokiana (...) sy ny fanompoana natao tamim-pitiavana no mampirotsaka ny fitahian'Andriamanitra. "Tsara izany, ry mpanompo tsara sady mahatoky; nahatoky tamin 'ny kely hianao, dia hotendreko ho mpanapaka ny be; midira amin'ny fifalian'ny tomponao." - Mat. 25:23. Tsy any amin'ny tanànan'Andriamanitra isika vao hahazo izany valisoan'ny fifaliana izany, fa ny mpanompo mahatoky dia miaina izany sahady eto amin'ity fiainana ity. - ST, 23 Janoary 1893.