"Aza manangan-tsaho foana. Aza mifandray tanana amin'ny ratsy fanahy ho vavolombelona mampidi-doza." -Eks. 23:1.
Mofon’aina:
Naseho ahy fa mbola miditra an-tsehatra amin'ny lalàn'ny tany Andriamanitra. Tsapan' ireo mpitondra sy ny vahoaka ny Fanahin'Andriamanitra mifehy ny toe-javatra, raha mbola ao amin'ny fitoerana masina i Jesosy. Mifehy amin'ny ampahany betsaka ny vahoaka eto an-tany anefa i Satana, ary .raha tsy nisy ny lalàm-panjakana dia ho fahoriana be no niainantsika. Naseho tamiko fa amin'ny fotoana ilana izany, ary rehefa antsoina hijoro ho vavolombelona ara-dalàna ny zanak'Andriamanitra, dia tsy fandikana ny Tenin'Andriamanitra ny fianianan'izy ireo hiantso an' Andriamanitra ho vavolombelona ny amin'ny filazany ny marina ary ny marina irery ihany. (...)
Tsy matahotra ny handainga (...) ny lehilahy sy ny vehivavy sasany; nefa nampianarina azy ireo (...) fa zava-mahatahotra ny fandaingana amin' Andriamanitra. Nomena ho ohatra amin' izany ny momba an'i Ananiasy sy i Safira. Nentina avy teo amin'ny olona hankeo amin'Andriamanitra ny toe-javatra, koa raha mijoro ho vavolombelona mandainga ny olona iray, dia tsy amin'ny olona no anaovany izany fa amin' ilay Andriamanitra lehibe izay mamaky ny ao am-po sy mahalala ny marina (...) rehetra. (...)
Matetika Andriamanitra no namaly ireo vavolombelona mandainga, ary tamin'ny fotoana izay nanononany fianianana mihitsy no namonoan'ny anjely mpandringana azy. Natao izany mba hahatonga fahatahorana eo amin'ireo mpanao ratsy. (...)
Nilefitra teo ambanin'ny fianianana i Jesosy tao anatin'ny ora nitsarana Azy. Hoy ny mpisoronabe taminy: "Ampianianiko amin' Andriamanitra velona Hianao hilaza aminay, raha Hianao no Kristy, Zanak' Andriamanitra." - Mat. 26:63. Dia hoy i Jesosy taminy: "Voalazanao." Raha ny fianianana ara-pitsarana no noresahin'i Jesosy tamin'ireo mpianany, dia ho niteny mafy ilay mpisoronabe Izy ary ho nanamafy ny fampianarany avy eo, ho tombontsoan'ireo mpanara-dia Azy amin'izao andro izao.
Mahafaly an'i Satana ny fiheveran' ny olona sasany ny fianianana na voady ho ratsy, satria manome hirika azy hifehy azy ireo sy haka eny aminy ny volan'ny Tompo izany. Tokony hanam-pahendrena bebe kokoa ny mpitantam-pananan'Andriamanitra ka hanao drafitra sy hiomana amin'ny fiatrehana ny famitahan'i Satana, satria ho lehibe kokoa noho ny hatrizay ny ezaka hataony. - TFC, b. 1, tt. 202, 203.