"Hianareo no fahazavan'izao tontolo izao. Tsy azo afenina izay tanàna miorina eo an-tampon-tendrombohitra." —Mat. 5:14.
Mofon’aina:
Misy zavatra iray izay tena ifantohan'ny sain' i Kristy indrindra eto amin'izao tontolo izao. Tsy inona izany fa ny fiangonany eto an-tany satria ny mambra ao aminy dia tokony haneho Azy eo amin'ny toetra amam-panahiny. Izao tontolo izao dia natao hiaiky fa ao amin'ny fivavahana Kristianina no misy ny fahamarinana masina, izay mirakitra haren-tsarobidy natao hampanan-karena ny hafa. Tao anatin'ireo vanim-potoan'ny aizina sy ny fahadisoan-kevitra ara-pitondrantena, nandritra ireo taonjaton'ny fifandonana sy ny fanenjehana, ny fiangonan' i Kristy dia toy ny tanàna niorina teo an-tampon-tendrombohitra. Hatramin' izay ka hatramin' izao, dia naseho tamin'ireo taranaka nifandimby ny foto-pampianarana madio raketin'ny Baiboly.
Mila miara-miasa amin'ny fiangonana any an-danitra anefa ny fiangonana eto an-tany, mba hahatonga azy hahomby amin'ny fanabeazana eto amin'izao tontolo izao. Mila manokatra ny fony ny mambra ao amin'ny fiangonana mba handraisana ny tara-pahazavana rehetra tian'Andriamanitra halefa. Misy fahazavana tian' Andriamanitra homena antsika araka ny fahafahantsika mandray izany, ka arakaraka ny handraisantsika no vao mainka hahazoantsika bebe kokoa hatrany amin'ny taratr’ Ilay fahamarinana (...)
Mbola ao anatin'ny fotoam-pahasoavana isika tsirairay, ao amin'ny sekoly iza hitakiana antsika ho tonga mpianatra mazoto tokoa. Ampirisihina isika handeha amin'ny mazava, tahaka ny nandehanan'i Kristy tao amin'ny mazava. Amin' izany no ianarantsika ny momba an'Andriamanitra, ary izao ny " fiainana mandrakizay, dia ny mahafantatra Anao Izay Andriamanitra tokana sady marina, sy Jesôsy Kristy, Izay efa nirahinao." — Jao.17:3. Ireo no tenin'Ilay niaraka tamin'ny Ray fony tsy mbola ary izao tontolo izao, raha nivavaka ho an'ireo izay hino an'Andriamanitra noh ny tenin'ny mpianany Izy. Ny fahalalana an'Andriamanitra eo amin'ny asany no tena siansa marina. Andeha hitombo fahalalana ny Tompo isika mandra-paharesy lahatra antsika fa mahatoky toy ny maraina ny fidirany an-tsehatra eo amin'ny fiainantsika. (...)
Fanahy mahatoky maro no mandrafitra ny fiangonan' Andriamanitra eto an-tany, ary efa nampidiriny ho ao amin'ny fifandraisam-panekena aminy ireo tamin'ny fampiraisina ny fiangonana eto an-tany amin'ny fiangonany any an-danitra. Efa naniraka ny anjeliny masina Izy mba hanompo ny fiangonany, ary ny vavahadin'ny fiainan-tsi-hita tsy haharesy azy. MR, b.2, tt. 265,266.