"Fa ny lalàna dia nomena tamin'ny alalan'i Mosesy; fa ny fahasoavana sy ny fahamarinana kosa dia tonga tamin' ny alalan'i Jesôsy Kristy." Jao. 1:17.
Mofon’aina:
I Jesôsy no fahazavan'izao tontolo izao. Niala avy teo amin'Andriamanitra Izy mba hitondra hafa-panantenana sy famonjena ho an'ny taranak'i Adama lavo. Raha mandray Azy ho Mpamonjy ny tenany manokana ny lehilahy sy ny vehivavy, dia manome toky Izy fa hamerina azy ho araka ny endrik'Andriamanitra ary hanavotra izay rehetra very tamin'ny alalan'ny fahotana. Nasehony tamin'ny taranak'olombelona ny fahamarinana tsy misy pentina. Rehefa nampianatra Izy, dia fahefana no nanaraka ny teniny satria fahalalana tsara ny fahamarinana no nolazainy.
Samy hafa tanteraka amin'ny fampia-naran'i Kristy ny fampianaran'ny olom-belona mety maty. (...) Mikiribiby amin'ny foto-kevi-diso sy ny hevi-poana tanany ny olombelona. Hifikitra mafy amin'ny fomba amam-panaon'olombelona izy ka hiaro izany amin-kery toy ny hoe izany no fahamarinana. Nambaran'i Jesosy fa izay rehetra avy amin'ny fahamarinana no handre ny feony.
Hery lehibe toy inona no miandry ny fitoriana ny Teny amin'izao andro izao raha mba tsy mihazona ny petra-kevitr'olombelona ny mpiasa fa mitoky kosa amin'ny lesona nomen'i Kristy sy ny fampiharana ny fivavahana. Izy izay tao amin'ny filan-kevitr 'Andriamanitra sady efa nitoetra tao amin'ny fanatrehany, dia mahafantatra tsara ny fiandohan'ny singa rehetra mandrafitra ny fahamarinana ary mahatakatra ny fifandraisany sy ny lanjany amin'ny taranak'olombelona. Nasehony tamin'ny taranak'olombelona ny drafi-panavotana ary novelariny teo anatrehany ny fahamarinana amin'ny laharany ambony indrindra (...)
Ny patriarika sy ny mpaminany ary ny apôstôly dia niteny toy ny nampirisihin'ny Fanahy Masina avokoa, tsy tamin'ny herin'ny tenany na tamin'ny anarany ny fanambarana mazava nataony. Fanirian'izy ireo raha tsy tolorana fankasitrahana noho izany izy ka heverina toy ny hoe izy ireo no niandohan'izay rehetra mety hahazoany voninahitra. Saro-piaro tamin'ny vonina-hitr'Andriamanitra izay tompon'ny fiderana rehetra izy ireo. Nambarany fa ny fahaizany sy ny hafatra nentiny dia nomena azy ho mpampita ny herin'Andriamanitra. Andriamanitra no fahefany sy fahampiana ho azy (...)
I Kristy no Tompon'ny fahamarinana rehetra. Ny foto-kevitra feno fahaizana, ny eritreritra feno fahendrena, ny fahaiza-manao sy ny talenta rehetra ananan'ny olombelona, dia fanomezana avy amin'i Kristy avokoa. Tsy nindrana foto-kevi-dehibe tamin'ny taranak'olombelona Izy fa Izy mihitsy no niandohan'ny zavatra rehetra. — RH, 7 Janoary 1890.