Vakio ny Eks. 12:17-23. Inona no anjara tanan'ny ra ao amin'ny fankalazana io andro firavoravoana vaovao io?
Singa manan-danja ny ran'ny biby atao fanatitra ao amin'ity fankalazana ity. Samy nanentina ny tolam-baravaran'ny tranony tamin'ny ran-janak'ondry novonoina, ireo izay nandray anjara tamin'io andro firavoravoana io. Toy izany no nanehoany ny finoany an'Andriamanitra, dia ny finoany fa hanafaka azy amin'ny loza miandry ireo izay tsy voarakotry ny ra Izy.
Fanehoana mahery vaika ny Filazantsara tokoa izany!
Tsy maintsy ho tsy misy kilema ilay zanak'ondrin'ny Paska, satria nanondro an'i Jesôsy Kristy izy, dia llay "Zanak'ondrin' Andriamanitra, Izay manaisotra ny fahotan'izao tontolo izao!" - Jao. 1:29. Nanana anjara toerana lehibe ny ran'ilay biby: naneho fiarovana izany, ary famantarana maneho fiainana amin'ny fotoan'ny fahafatesana.
"Ary ny ra dia ho famantarana ho anareo eo amin'ny trano izay itoeranareo; ary raha mahita ny ra Aho, dia handalo anareo, ka tsy hisy loza handringana anareo, raha mamely ny tany Egypta Aho." - Eks. 12:13.
Mifandray amin'ny fankalazana ny Paska ny filazantsara manontolo satria tsy vitan'ny manondro ny fanafahana amin'ny fanandevozana sy ny fizorana ho any amin'ny Tany Nampanantenaina izany, fa maneho koa ny sorona nataon'i Jesôsy Kristy noho ny fahotantsika, sy ny fanomezany ny fahamendrehany ho an'izay rehetra voarakotry ny rany.
Taonjato maro taty aoriana dia nanoratra toy izao i Paoly momba io fankalazana io: "Esory ny masirasira ela, mba ho vongana vaovao hianareo, araka izay tsy maha-misy masirasira anareo. Fa voavono Kristy, Paska ho antsika." - 1 Kôr. 5:7.
Nampiasaina hanamboarana koba isan-karazany ny lalivay na ny masirasira. Tamin'ny fotoana nanamboarana ny mofo tsy misy masirasira, ny alina talohan'ny nivoahan'ny Isiraelita tao Egypta, no iresahana voalohany izany ao amin'ny Baiboly. Tsy maintsy nesorina tsy ho ao an-tranon'izy ireo koa ny masirasira (Eks. 12:8, 15-20; Eks. 13:3-7). Ao anatin'io tontolon-kevitra io manokana, ny masirasira dia tandindon'ny fahotana (1 Kôr. 5:6-8); koa tsy azo nampiasaina izany mandritra ny fankalazana ny Paska mandritra ny herinandro.
Tandindon'ny Mesia tsy manan-tsiny, izay nandresy ny fakam-panahy rehetra ary nanolotra ny ainy ho antsika, ny mofo tsy misy masirasira (Jao. 1:29; 1 Kôr. 5:7; Heb. 4:15). Ny "hysopa iray fihina" izay natsoboka tao amin'ny ra, dia maneho ny fahasoavan Andriamanitra manadio (Sal. 51:7). Raha fintinina dia voaseho mandritra ny Pesach manontolo ny asa fanavotana nataon'i Jesôsy .
Ny ran'i Jesôsy , Izay Andriamanitra mihitsy, no nilaina mba hanavotana antsika noho ny fahotantsika. Inona no ambaran'izany amintsika momba ny haratsin'ny fahotana?