Vakio ny Sal. 1:1-3, Sal. 112:1-9, sy ny Sal. 128.
Azo inoana fa ny fiadanana no anisan'ny fitahiana lehibe indrindra amin'ireo fitahiana maro omena ny olona izay manome haja ambony ny Tompo. Oharin'ny Sal. 1 amin'ny hazo ambolena eo amoron'ny rano velona, izay mamoa amin'ny fotoany, ary ny raviny koa tsy mba malazo, ny olo-marina (Sal. 1:3; Jer. 17:7,8; Ezek. 47:12). Manambara io fampitahana io fa ny mitoetra eo ambanin'ny fanatrehan'Andriamanitra sy ny fananana fifandraisam-pitiavana tsy tapaka amin'Andriamanitra no loharanon'ny fitahiana rehetra. Tsy tahaka ny ratsy fanahy izay oharina amin'ny akofa, tsy marin-toerana sady tsy manana hoavy, ny olo- marina, fa toy ny hazo mamoa sy mamaka ary mitoetra eo anilan'Andriamanitra sy ny fiainana mandrakizay.
on Mampahatsiahy ireo fitahiana ao amin'ny fanjakan'ny Mesia ny Sal. 128:2,3, izay manambara fa midika fiadanana sy fanambinana ny fipetrahana eny ambanin'ny voaloboka sy ny aviavin'ny tena (Mika 4:4). Maneho fanantenana ny Mesia Izay hamongotra ny ratsy sy hitondra fiadanana ho an'izao tontolo izao ny fitahiam-piadanana notononina ho an'i Jerosalema (Sal. 122:6-8; Sal. 128:5,6).
"Ao amin'ny Baiboly ny lovan'ny voavonjy dia atao hoe: «taniny». Ary Ilay Mpiandry ondrin'ny lanitra no mitarika ny andian'ondry ho eo amin'ny loharanon'ny ranon'aina. Mamoa isam-bolana ny hazon'aina, ary ny ravin'ny hazo dia ho fanasitranana ny firenena. Misy renirano mikoriana lalandava, tahaka ny vato kristaly, ary eo amin'ny andaniny roa dia misy hazo manofahofa ny raviny manalokaloka ny lalana namboarina ho an'ny navotan'i Jehovah. Ao ireo lohasaha midadasika dia misandratra ho havoana mahafinaritra, sy ireo tendrombohitr'Andriamanitra mampisondrotra irony tendrony mijoalajoala. Eo amin'ireo lohasaha mandry, fahizay ireo, eny amoron'ireo rano velona no nahita fonenana ny vahoakan'Andriamanitra, izay efa ela no naha-mpivahiny sy mpirenireny azy."- HM, t. 702.
Ambaran'ny TV fa amin'ny fiavian'i Kristy fanindroany, rehefa hoforonina ilay tontolo vaovao (Mat. 26:29; Apôk. 21), no hahatanteraka izany fanantenana zany. Koa na mandray fitahiana maro aza ny olo-marina eto amin'ity fiainana ity, dia amin'ny andro farany, rehefa tafaorina tanteraka ny fanjakan'Andriamanitra, no hisitrahan'izy ireo amin'ny fahafenoany ny fahasoavan'Andriamanitra.
Noho ny hazo fijaliana sy izay nitranga teo dia azo antoka ireo teny ikasana ao amin'ny TV momba ny zavatra izay efa nomanin'Andriamanitra ho antsika; nahoana? Ahoana no andraisantsika fampaherezana avy amin'ireo teny fikasana ireo na dieny ankehitriny aza?