"Fa izay tany mifoka ny ranonorana milatsaka aminy matetika ka maniry anana tsara ho an'ny olona iasana azy dia mahazo fitahiana avy amin'Andriamanitra; fa izay maniry tsilo sy songosongo kosa dia lavina sady akaikin'ny ozona, ary ny hiafarany dia hodorana." — Heb. 6:7,8.
Mofon’aina:
Mila ampianarina ny tanora fa ny fiainana dia asa mafy, andraikitra, sy fikarakarana. Mila hofanina izy ireo mba ho olona mahay miatrika — lehilahy sy vehivavy mahalala ny tokony hatao rehefa mitranga ny tampoka. Tokony hampianarina azy fa ny fanarahan-dalàna amin'ny asa mitohy tsy tapatapaka dia tena ilaina tokoa (...).
Na dia teo aza ireo voalaza sy voasoratra rehetra momba ny maha-mendrika ny asa dia manjaka ny fiheverana fa manambany izany. Ny zatovolahy dia maniry mafy ho tonga mpampianatra, mpiasa birao, mpivarotra, mpitsabo, mpisolovava, na hanao asa hafa izay tsy mitady fampiasana mafy ny herim-batana. Ny zatovovavy indray dia tsy tia manao raharaha ao an-trano ary mitady sehatra hafa hianarana. Izy ireny dia mila mianatra fa tsy manambany velively ny miasa amim-pahamarinana. Ny fahazarana midonana-poana sy tia tena no manambany. (...)
Koa satria samy manana ny anjara raharahany avy ny lehilahy sy ny vehivavy ao an-trano dia tokony hanam-pahalalana ny amin'izay tokony hatao amin'ny fikarakarana tokantrano koa (...) ny tovolahy sy ny tovovavy. (...) Aoka ny ankizy hahita ao amin'ny Baiboly fa Andriamanitra dia nanome haja ny raharahan' ireo mpiasa isan'andro. Aoka hovakiny ny momba ny "zanaky ny mpaminany" (2 Mpanj. 6:1-7), (...) izay nanorina ny trano nitoerany sy nanehoana fahagagana: dia ilay lelam-pamaky nindramina ka very, kanefa natsinkafona avy ao anaty rano. Aoka izy ireo hamaky ny amin'i Jesôsy ilay mpandrafitra sy i Paoly mpanao lay, izay nanao ny asa ambony indrindra ho an'ny olona sy ho an'Andriamanitra tamin'ny alalan'ny asan-tanany. (...) Eo koa ny tantaran'i Dorkasy, ilay mpanjaitra, izay natsangana tamin'ny maty mba hanohizany ny zaitrany ho an'ny mahantra; ny tantaran'ilay vehivavy hendry ao amin'ny Ohabolana (...) izay "mizaha volon'ondry sy rongony (...) ary mazoto miasa amin'ny tànany," (...) izay "mitandrina tsara ny ataon'ny ankohonany (...) ary tsy homana ny mofon'ny fahalainana." (Ohab. 31:13,27). - Fk, tt. 241-243.