"Hianareo no vavolombeloko, hoy Jehôvah , sady mpanompoko izay efa nofidiko, mba hahafantaranareo sy hinoanareo Ahy ka ho azonareo tsara fa lzaho no Izy; Talohako dia tsy nisy andriamanitra voaforona, sady tsy hisy handimby Ahy." Isa. 43:10.
Mofon’aina:
Miezaka mandrakariva i Satana manodina antsika hiala amin’ny fahatokiana sy ny fahavitrihana amin’ireo asa manan-danja amin’ny fiomanana amin’ilay toe-javatra lehibe izay hizaha toetra ny fanahin’ny tsirairay. Mitohy ny asa ao amin’ny fitoerana masina any an-danitra. Manadio ny fitoerana masina i Jesôsy . Mitovy amin’ny asa atao any an-danitra ny asa atao ety an-tany. Miasa tsy an-kiato ireo anjelin’ny lanitra mba hisarihana ny olombelona, ireo izay velona, mba hijery an’i Jesôsy sy hibanjina Azy, mba hahatonga azy ireo ho resy lahatra ny amin’ny tsy fahatanterahan’ny toetrany eo am-pahitana ny fahatanterahan’i Jesôsy. Hoy i Kristy (...) momba ilay Mpananatra nampanantenaina: “Izy no ho vavolombelona hanambara Ahy”. Izany no votoatin’ny hafatra torina ankehitriny. (...)
Mitenena tahaka ny nitenenan’i Kristy. Miasà tahaka ny niasany. Tsy maintsy mijery an’i Kristy isika, dia ho velona. Rehefa tsapantsika ny fahatsaran’i Kristy, dia haniry fatratra ny hampiseho ny hatsaram-panahiny sy ny fahamarinany isika. Amin’ny alalan’ny fibanjinana an’i Kristy no hahatonga antsika hiova ho araka ny endriny. (...) Hiravoravo amin’ny fifaliana tsy hay lazaina sy feno voninahitra isika. Rehefa izay, dia asaina isika hiditra ao amin’ny tanàna sy tanàn-dehibe hafa, amin’ny fo mamirapiratry ny fitiavan’Andriamanitra, mba hilaza aminy ny vaovao mahafaly (...).
Lazao amin’ny hafa ireo fahamarinana mirakitra fitahiana ao amin’ny Teniny (...). [Lazao azy ireo] fa ny fitiavantsika Azy no ataony manesika antsika hitandrina ny didiny. Ataony izany, tsy ny handrisihana antsika hanao zavatra tsy ho vita tsy akory, fa satria fantany ny hevitr’izany mitandrina ny didin’ny Rainy izany. Iriny raha ny fanahy tsirairay izay mandre ny fanasany no hanasa ny hafa koa, ary handray ny fanomezany sarobidy indrindra. Fantany mantsy fa rehefa mitandrina ny didin’Andriamanitra isika dia tsy tonga andevo tsy akory, fa ho olona afaka kosa amin’ny alalan’ny ran’i Jesôsy Kristy. “Ary ny mpanomponao dia hazavain'ireny; amin’ny fitandremana azy [ny didiny] misy valiny lehibe.” – Sal. 19:11. — UL, t. 344.