"Endrey! Manao ahoana ny fitiavana nasehon'ny Ray ho antsika, dia ny niantsoana antsika hoe zanak'Andriamanitra, sady izany tokoa isika! Koa noho izany dia tsy mahalala antsika izao tontolo izao, satria tsy nahalala Azy izy. " - 1 Jao. 3:1.
Mofon’aina:
"Ry malala, ankehitriny aza dia zanak'Andriamanitra isika, nefa tsy mbola naseho izay ho toetsika rahatrizay. Fantatsika fa raha hiseho Izy, dia ho tahaka Azy isika, fa ho hitantsika Izy, dia izay tena endriny tokoa. Ary izay rehetra manana izany fanantenana miorina aminy izany dia manadio ny tenany mba hadio tahaka Azy." –1 Jao. 3:2,3.
Aseho ao amin'io andininy io ireo tombontsoan'ny Kristianina, izay vitsy no mahatakatra azy. Tokony ho fantatsika tsara ireo fitahiana omen'Andriamanitra antsika ao amin'ny Teniny. Nanome toky antsika Izy ny amin'izay hataony ho antsika. Ary izay rehetra nampanan-tenainy dia tanteraka noho ny fanatitra nataon'i Kristy ho antsika.
Nanambara Ilay mahatonga antsika ho zanakalahy sy zanakavavin'Andriamanitra i Jaona mpanao batisa. "Izay rehetra nandray Azy dia nomeny hery ho tonga zanak'Andriamanitra, dia izay mino ny anarany." – Jao. 1:12.
Tsy zavatra azontsika vidina ny maha-zanak'Andriamanitra. Izay mandray an'i Kristy ho Mpamonjy ny tenany manokana ihany no omena hery ho tonga zanakalahy sy zanakavavin'Andriamanitra. Tsy hain'ny mpanota atao amin'ny herin'ny tenany ny miala amin'ny fahotana. Hery ambony lavitra noho ny an'ny tenany no ilain'izy ireo vao tanteraka izany. Hoy i Jaona; "Indro ny Zanak'ondrin'Andriamanitra, Izay manaisotra ny fahotan'izao tontolo izao! " – Jao. 1:29. I Kristy irery ihany no manana hery mahadio ny fo. Izay mitady famelan-keloka sy fankasitrahana dia tsy afaka hilaza afa-tsy hoe: "Tsy misy azon'ny tanako atolotra Anao; ny mifikitra amin'ny hazo fijalianao no azoko atao." (...)
Hahazo famelan-keloka izay rehetra manatona an'i Jesôsy amim-pinoana. Vantany vao mangataka fanampiana amin'ny Mpamonjy mba hialana amin'ny fahotana ny olona mibebaka, dia miasa avy hatrany ny Fanahy Masina manova ny fo. "Izay rehetra nandray Azy dia nomeny hery ho tonga zanak'Andriamanitra". Tsy tokony hanetsika antsika hiasa bebe kokoa ve izany, dia isika izay miezaka maneho ny fanantenana raketin'ny filazantsara amin'ireo mbola ao anatin'ny haizin'ny fahadisoana? — RH, 3 Septambra 1903.