"Dia hamaly ny Mpanjaka ka hanao aminy hoe: Lazaiko aminareo marina tokoa: Araka izay efa nataonareo tamin'ny anankiray amin'ireto rahalahiko kely indrindra ireto no nataonareo tamiko." - Mat. 25:40.
Mofon’aina:
Nofenoin'Andriamanitra ny fahatsarany ny tany ary nataony ampoky ny zava-tsoan'ny fiainana, koa tsy misy fialan-tsiny mihitsy ny famelana ny trano firaketan'Andriamanitra ho foana. Tsy afa-tsiny ny Kristianina raha manandratra ny fitarainany any an-danitra ny mpitondratena sy ny kamboty noho ny tsy fahampiana mampahory azy ireo, kanefa Andriamanitra, noho ny fahalalahan-tanany, dia efa nametraka harena safononoka teo an-tanan'ireo Kristianina ireo mba hanampiany ny sahirana amin'izay ilainy. (...)
Eo amin'ny tontolo mitonona ho kristianina dia betsaka tokoa ny vola lany amin'ny fisehoana tafahoatra, toy ny firavaka sy ny haingo, izay ampy hamahanana ny noana rehetra sy hampitafiana ireo mitanjaka ao amin'ny tanàna sy ny vohitra misy antsika; kanefa amin'izany dia tsy voatery hihafy akory ireo mitonona ho mpanara-dia an'i Jesosy, Ilay malemy fanahy sady tsy miavona am-po, fa hanana sakafo sahaza sy fitafiana mendrika ihany. Inona no holazain'ireo mambran'ny fiangonana ireo rehefa tonga ny andro lehiben'i Jehôvah ka hampifanatrehana aminy ireo mahantra sy nampahorina ary mpitondratena sy kamboty, (...)?
Misy vehivavy izay milaza fa manana toe-panahy araka an'Andriamanitra, kanefa miravaka haban-tanana sy rojo volamena, na firavaka hafa lafo vidy (...). Fahantrana sy fijaliana ary olona fadiranovana anefa no hita eny rehetra eny. Tsy mampiraika azy ireny olona ireny, ary tsy manetsika ny fangorahany akory; kanefa ny fijaliana foronina izay soritsoritana ao amin'ny sarimihetsika nivoaka farany dia mampitomany azy. (...) Izao no holazain'i Kristy amin'ny olona toy izany: "Noana Aho, fa tsy mba nomenareo hanina; nangetaheta Aho, fa tsy mba nampisotroinareo; (..) narary sy tao an-trano-maizina Aho, fa tsy mba novangianareo." – Mat. 25:42,43.
Hoy kosa i Kristy amin'ireo marina: "Noana Aho, dia nomenareo hanina; nangetaheta Aho dia nampisotroinareo; nivahiny Aho, dia nampiantranoinareo; tsy nanan-kitafy Aho, dia notafianareo; narary Aho, dia notsaboinareo; tao an-trano-maizina Aho, dia novan-gianareo. " – Mat. 25:35,36. (...) Dia toy izany ny firaisam-pon'i Kristy amin'ny olombelona mijaly; raisiny ho tombontsoan'ny Tenany ny tombontsoan'izy ireo. RH, 21 Nôvambra 1878.