" Ary Jesôsy niteny tamin’ny olona indray ka nanao hoe: 'Izaho no fahazavan’izao tontolo izao; izay manaraka Ahy tsy mba handeha amin’ny maizina, fa hanana ny fahazavan’aina." Jao.8:12.
Mofon'aina:
Ny mpanara-dia an’i Jesôsy dia mpiara-miasa amin’Andriamanitra. Tsy handeha amin’ny maizina izy, fa hahita kosa ny lala-marina, ka i Jesôsy (...) no hitari-dalana azy. Eo am-pizorany ho any Ziona, mandroso amim-pinoana, dia hiaina fanandramana mamiratra kokoa amin’ny zava-panahy izy ireo. Ny iraka notanterahin’i Kristy (...) ilay nahatonga Azy handao ny seza fiandrianan’Andriamanitra mba ho eo amin’ny alitaran’ny hazo fijaliana feno misitery, dia hihamazava hatrany amin’ny saina, ary ho hita fa ilay sorona nataon’i Kristy no loharano nipoirana sy foto-kevitra ijoroan’ny asam- pitiavana rehetra. Ny fitiavan’i Kristy no hery manosika ny tena mpanao asa misionera hitety tanàn-dehibe, vohitra, lalambe sy lalankely manerana izao tontolo izao.
Ny fiangonan’Andriamanitra eto an-tany dia naorina mba hanao asa misionera, koa zava-dehibe indrindra ny hahatongavan’ny mambra tsirairay ho mpiara-miasa mahatoky amin’Andriamanitra (...) ary noho izany dia mampiasa ny heriny rehetra araka ny fahafaha-manao nomena azy ho amin’ny famonjem-panahy. Takin’i Jesôsy Kristy ny hanaovan’izay rehetra antsoina amin’ny Anarany, ny asany ho lohalaharana sy zava-dehibe indrindra ifantohan’ny saina, ka hiarahan’izy ireo miasa amim-pahafoizan-tena miaraka amin’ny anjelin’ny lanitra ho famonjena ireo olom-bery izay nanoloran’i Kristy ny ainy.
Ny fampiasana tsy araka ny tokony ho izy ny fananana na ny fahefana, na izay rehetra fahafaha-manao ara-tsaina sy ara-batana, dia fandrobana an’Andriamanitra sy fandrobana izao tontolo izao; satria izany dia fanodinana ny hery izay natokan’Andriamanitra hampiasaina amin’ny fanavotana izao tontolo izao. Fony i Kristy tety an-tany, dia naniraka ny mpianany Izy mba hitory ny fanjakan’Andriamanitra eran’i Jodia, ary nasehony mazava tamin’ny alalan’izany ohatra izany fa hatrizay hatrizay dia adidin’ny mpanara-dia Azy ny mampita amin’ny hafa ny fahalalana izay ananany momba ny lalana sy ny fahamarinana ary ny fiainana. Tamin’ny asany rehetra dia nokendren’i Jesôsy ny hanofana ny fiangonany ho amin’ny asa misionera, ary arakaraka ny hitomboan’ny hamaroany no hiitaran’ny asa mandra-pahatongan’izao tontolo izao ho voahodidin’ny hafàtry ny filazantsara amin’ny alalan’ny asa fanompoan’izy ireo. – RH, 30 Oktôbra 1894.