"Amorony fo madio aho, Andriamanitra ô; ary havaozy hiorina marina ny fanahiko ato anatiko." Sal. 51:10.
Mofon’aina:
Aoka ianao hangataka amin' Andriamanitra amin-dranomaso hoe: havaozy ny fanahiko ato anatiko. Angataho amin'Andriamanitra ilay herin'ny fahasoavany mahay manova. Mifikira mafy amin'ny Mpamonjinao tahaka izay nataon'i Jakoba, mandra-pahatonga an'Andriamanitra hampaha-fantatra anao mazava ny momba anao sy ny momba Azy ka hahazo tanjaka sy fanohanana ao amin'i Jesosy ianao, fahazavana sy hery izay tsy mbola hitanao na tsapanao hatrizay. Tandindomin-doza lehibe ny famonjena ny fanahinao, ka mitalaho aminao aho ankehitriny, aza mamitaka ny fanahinao. Handresy ianao raha mifikitra amim-paharetana amin'ny teny fikasana ny finoanao. (...)
Tsy misy fahefan'ny tany na an'ny helo haharava ny fiadananao na hanapaka ny firaisanao amin'Andriamanitra raha mijoro amin' izay niantsoana anao ianao. Tokony handeha tsy amin'ahiahy ianao raha toa matahotra an'Andriamanitra. Raha manao izay ankasitrahany ianao dia ho azonao izay rehetra irin'ny fanahinao. Izao no teny ataon'ny Kristianina iray mahatoky: "Tsy misy na inona na inona atahorako eto amin' izao rehetra izao afa-tsy ny tsy hahafantarako ny adidy tokoriy hataoko na koa ny tsy hahatanterahako izany." (...)
Mijoroa ho an'i Jesosy, na dia mitaky fahafoizan-tena sy fandavan-tena aza izany. Mijoroa ho Azy, any amin'ny toerana rehetra. Miasà toy ny hoe manatrika eo Andriamanitra ka mifantoka tanteraka aminao ny masony ary mahita izay atao rehetra. Efa novidiny tamin'ny rany ianao, ka amin'ny fotoana ilanao ny Fanampiany, antsoy Izy dia ho azonao izany. (...)
Aoka ny fiainanao izay fohy sy tsy azo antoka ho fiomanana mitohy ho amin'ny fiainana ho avy tsy misy fahafatesana. Avela ho tonga amintsika ny fakam-panahy mba hahalalana ny tena toetrantsika sy hanitsiana ny kilemantsika. Misy hatrany ny fitaomana hanota tsy miharihary izay mikendry ny hamitaka sy handrenoka ny fanahy mba hahavery azy. Hiseho ho toy ny anjelin'ny mazava i Satana, hevitra kotrehiny mandrakariva ny handroba ny voninahitr'Andriamanitra amin'ny alalan'ny fanimbany fanahy maro. Miangavy anao aho, ho famonjena ny fanahinao, manohera ny devoly, dia handositra anao izy. Aoka ny fanahinao tsy manan-kery hiantehitra amin'Andriamanitra. - L 42, 1879.