"Nefa izao no olona hotsinjoviko, dia izay malahelo sy torotoro fanahy sady mangovitra noho ny teniko." - Isa. 66:2d.
Mofon’aina:
Manao fahadisoana mampalahelo ireo izay mitady laza sy voninahitra eto amin'izao tontolo izao. Izay manda ny tenany sy manome lanja ny hafa no hipetraka eo akaikin'i Kristy eo amin'ny seza fiandrianany. Ilay mamaky ny ao am-po no mahalala ny tena fahamendrehan'ny mpianatra feno fanetren-tena sy fahafoizan-tena, ary satria mendrika izy ireo dia hapetrak'i Kristy eo amin'ny toerana manan-kaja, na dia tsy mahatsiaro ho mendrika sy tsy mitady voninahitra aza. (…)
Tsy misy vidiny amin' Andriamanitra ny fisehosehoana ivelany. Maro amin'ireo mihevi-tena ho ambony noho ny hafa no hahita indray andro any fa ny fo mangoraka sy ny fahafoizan-tena ananan'ny olona no anombanan'Andriamanitra azy. (…) Ambony lavitra dia lavitra eo imason'Andriamanitra ireo izay manaraka ny ohatra nasehon' I lay nandehandeha nanao soa, nanampy sy nitahy ny mpiara-belona Taminy ary niezaka nampitraka azy ireo hatrany, raha miolotra amin'ireo tia tena sy manandra-tena.
Tsy noho ny fahaiza-manao ananan' ny olona no aneken' Andriamanitra azy, fa noho izy mikatsaka ny tavany sy ny fanampiany. Tsy mba tahaka ny fijerin'olona ny fijerin'Andriamanitra. Tsy mitsara ny miseho ivelany lzy fa mandinika ny fo, ary marina ny fitsarany. Hoy Izy: "Nefa izao no olona hotsinjoviko, dia izay malahelo sy torotoro fanahy sady mangovitra noho ny teniko." Mandray sy miombona amin'ireo mpianany tsotra sy manetry tena Izy satria mahita ao amin'izy ireo fitaovana sarobidy indrindra, izay (...) hahazaka fitsapana mahamay sy tsindry.
Izao no tokony ho tanjontsika eo am-piasana ho an'ny Tompo: ny hanome voninahitra ny anaran'Andriamanitra ao amin'ny fiovam-pon'ny mpanota. Tsy ankasitrahan'Andriamanitra kosa ireo izay miasa mba hahazo dera. (...)
Hiombom-pifaliana amin'ny Mpamonjy ny mpanompo manetry tena, izay tsy mitoky amin'ny fahaizany lehibe, fa miasa amim-pahatsorana sy matoky an'Andriamanitra mandrakariva. Hitondra fanahy maro ho eo am-pototry ny hazo fijaliana ny faharetany mivavaka. (...)
Hazo nambolen'ny Tompo ireo mpiasa ireo. Hamoa voa toy ny an'ny Apôstôly izy ireo. Lehibe ny valim-pitia miandry azy ireo any amin'ilay fiainana ho avy: - RH, 4 Jolay 1907.