"Elia dia olona tahaka antsika ihany, ary izy nahery nivavaka mba tsy hilatsahan'ny ranonorana; dia tsy nilatsaka tamin'ny tany ny ranonorana telo taona sy enim-bolana. Ary, nivavaka indray izy, dia nandatsaka ranonorana ny lanitra, ka nahavokatra ny tany." - Jak. 5:17,18.
Mofon’aina :
Lesona lehibe no aseho amintsika amin'ny alalan'ny fanandraman'i Elia. Nozahan-toetra ny finoany rehefa nivavaka teo an-tendrombohitra Karmela izy mba hilatsahan'ny orana. Nitalaho tamim-paharetana tamin'Andriamanitra anefa izy.
Nitazana ny ranomasina mandrakariva ny mpanompon'i Elia rehefa nivavaka izy. Inenina izy no niverina tany amin'i Elia sady nilaza fa tsy misy na inona na inona mitranga, tsy misy rahona akory na famantarana fa ho avy ny orana. Tsy kivy anefa ilay mpaminany. Namerina nandinika ny fiainany indray izy mba hahitany hoe taiza ho aiza no mety tsy nanomezany voninahitra an'Andriamanitra. (...) Rehefa nandinika ny fony izy, dia hitany toa latsaka ambany teo imasony sy teo imason'Andriamanitra ny tombam-bidin'ny tenany. Nahatsapa tena ho tsinontsinona izy (...). Tonga ny valim-bavaka rehefa nanda tena izy ka nifikitra tamin'ny hery sy ny fahamarinan'ny Mpamonjy irery ihany. Niverina ilay mpanompo nilaza hoe: "Misy rahona kely hoatra ny tanan'olona miakatra avy eny amin'ny ranomasina." - 1 Mpanj. 18:44.
Tsy mba manampin-tsofina amin'ny hataka ataontsika Andriamanitra; ary raha zahantsika toetra ny tenany, dia hanome voninahitra ny finoantsika Izy. Tiany ho iray amin'ny sitrapony ny sitrapontsika, amin' izay dia afaka hitahy antsika tanteraka Izy. Ary tsy haka ny voninahitra ho an'ny tenantsika isika rehefa mandray fitahiana, fa homentsika an'Andriamanitra avokoa ny dera sy ny laza. Tsy voatery hamaly avy hatrany ny vavaka ataontsika Andriamanitra raha vantany vao mivavaka isika. Raha manao izany mantsy Izy dia mety hoheverintsika fa efa antsika rahateo sy zontsika ny hahazo ny fitahiana sy ny fanampiana rehetra avy Aminy. Tsy handini-tena isika andrao misy zava-dratsy kolokolointsika ao am-po, andrao nanota isika, fa hanjary feno tsy firaihana isika ka tsy hahatsapa fa miankina amin'Andriamanitra. (...)
Nanetry tena i Elia mandra-pahatsapany fa tsy azy ny voninahitra. Izany no fepetra hihainoan'ny Tompo ny vavaka (...). Andriamanitra irery no mendrika homem-boninahitra. — OHC, t. 133.