Ny tsikin'Andriamanitra

"Ny fitahian'Andriamanitra no mampanan-karena, ary tsy azon'ny fisasarana ampiana alahelo izany." - Ohab. 10:22.  

Mofon’Aina:
Tsy misy na inona na inona mety hahitantsika soa marina raha tsy   eo ny fitahian'Andriamanitra. Izay tahin'Andriamanitra dia voatahy tokoa. Koa "tsara lavitra ny kely ananan’ny olona marina anankiray noho ny be ananan’ny ratsy fanahy maro" - Sal. 37:16. Ombam-pahombiazana kokoa ny fananana kely miaraka amin'ny fitahian'Andriamanitra, ary mbola hitombo be lavitra. (...). Rehefa manolo-tena hanao ny raharahan'ny fanjakan'Andriamanitra isika dia hiahy ny raharahantsika Izy. 
Nomen'ny Tompo fitahiana sarobidy isika ao amin'ireny voninkazo eny an-tsaha ireny, izay maha-velom-bolo antsika ny fofony mamerovero. Nomeny loko kanto ny voninkazo tsirairay; Izy mantsy no Ilay Mpahay zava-kanto lehibe indrindra. Ary ilay namorona izany zavatra tsara tarehy teo amin'ny voary izany, dia hanao zavatra tsara lavitra ho an'ny fanahy tsirairay. Tia ny tsara Andriamanitra, ary iriny horavahana amin'ny harem-pahasoavany ny toetransika. Tiany ho manim-pofona toy ny voninkazo eny an-tsaha koa ny fitenintsika. Tahiny isika ka omeny antsika isan'andro izay ilaintsika ara-nofo. Maneho sy mitondra ny mariky ny hazo fijaliana na dia ny mofo hanintsika aza. 
Ny olona izay manao lohalaharana ny fahazoana antoka ny fitahiana maharitra mandrakizay hoenti-mamoky ny fanahiny no tena sambatra. Hoy ny Mpamonjintsika hoe "Fa katsaho aloha ny fanjakany sy ny fahamarinany, dia hanampy ho anareo izany rehetra izany" - Mat. 6:33. Miahy antsika Andriamanitra, eny, tahiany koa ny ara-nofontsika. Tsy misy ataon'Andriamanitra ambanin-javatra izay mahasoa antsika eto an-tany. 
Fantany tsara fa ilaintsika ireo zavatra ireo. Rehefa itsikian'Andriamanitra ny ezaka ataontsika, dia izany no tsara lavitra noho ny vola rehetra mety ho azontsika eto an-tany. (...) "Manjary mamy ery isan'andro ny fisahiranantsika rehefa mifangaro amin'ny fitiavany antsika!" 
Ny fanafahana rehetra sy ny fitahiana rehetra izay efa nomen'Andriamanitra ny olony tamin'ny lasa, dia tokony ho velomina mandrakariva ao amin'ny fitadidiantsika, mba ho tonga toky azo antoka ny amin'ny hanomezany antsika fitahiana lehibe sy mitombo hatrany. 
Nomena tombontsoa handray fitahiana isika, ary tsy misy fetra izany fitahiana izany. - OHC, t. 196.