"Ary raha handeha hamboatra fitoerana ho anareo Aho, dia ho avy indray ka handray anareo ho any amiko, ka izay itoerako no hitoeranareo koa." — Jao. 14:3
Mofon'Aina:
Valonjato sy arivo taona mahery no lasa hatramin'ny nampanantenan'ny Mpamonjy ny hiverenany indray. Nandritra ny taonjato maro dia nameno herim-po ireo nahatoky taminy ny teniny. Tsy mbola tanteraka ilay fampanantenana saingy tsy latsa-danja amin'izany ny teny izay voalaza.
Ho avy amin'ny voninahitry ny Tenany, amin'ny voninahitry ny Ray ary amin'ny voninahitry ny anjely masina i Kristy. Ireo anjely alinalina, ireo zanak'Andriamanitra manana hatsarana sy mpandresy, amin'ny hatsarana sy voninahitra tsy mbola nisy toy izany no hanotrona Azy eo amin'ny lalany. Hisatroka satroboninahitra maro sosona Izy fa tsy satro-tsilo. Ho solon'ny akanjo volomparasy tonta dia hampiakanjoana akanjo fotsy indrindra Izy, "ka tsy misy mpamotsy lamba ambonin'ny tany mahafotsy toy izany"- Mar. 9:3. Eo amin'ny akanjony sy ny feny no hanoratana ny anarana hoe "MPANJAKAN'NY MPANJAKA SY TOMPON'NY TOMPO" (Apok. 19:16).
Ho an'ireo mpanaraka azy mahatoky dia namana isan'andro, eny, sakaiza akaiky i Kristy. Niaina tao anatin'ny firaisana ety sy tsy tapaka tamin'Andriamanitra izy ireo. Misandratra amin'izy ireo ny voninahitry ny Tompo. Amin'izy ireo no mitaratra ny fahazavan'ny fahalalan'ny voninahitr'Andriamanitra eo amin'ny endrik'i Jesôsy Kristy. Ankehitriny, mifaly amin'ireo taratra fenon'ny famirapiratana sy ny voninahitry ny Mpanjaka ao amin'ny fanjakany izy ireo. Vonona ho amin'ny firaisana amin'ny lanitra izy satria ao am-pony ny lanitra.
Miandrandra izy ireo, mamirapiratra eo aminy ny taratr'Ilay Masoandron'ny fahamarinana, mifaly amin'ny fiavian'ny fanavotana azy izy ireo, ary manatona Ilay Mpampakatra izy ka milaza hoe: "Indro Andriamanitsika, izay nandrasantsika hamonjy antsika."- Isa. 25:9.
Efa ho tapitra ny fotoam-piandrasana. Kely sisa dia harabaina tonga soa avokoa ireo mpandeha lavitra sy mpivahiny izay nitady firenena tsara kokoa. Te hihiaka amin'ny feo avo aho hoe: "Hody isika!" (...) "Koa amin'izany, ry malala, satria manantena izany zavatra izany hianareo, dia mazotoa mba ho hita tsy manan-tsiny amam-pondro eo anatrehan'ny Tompo amin'ny fihavanana."-2 Pet. 3:14.- OHC, t. 367.