Vakio ny Mat. 5:17,18; Sal. 111:7, 8; Mpitt. 12:13, 14; 1 Jao. 5:3; sy ny Ohab. 28:9. Inona no ampianarin'ireo andininy ireo antsika momba ny fifandraisan'ny Kristianina amin'ny lalàna?
Manaraka ny dian'ireo mpanavao fivavahana protestanta izay nitandro ny fahamasinan'ny lalan'Andriamanitra ireo Advantista mitandrina ny andro fahafito. Mariho ity fanambarana miezinezina nataon'i John Wesley ity: "Ny Tompontsika dia tonga mba handrava sy hanafoana tanteraka ireo fombafomba sy ny lalàna serernoniely nomen'i Mosesy ny zanak'Isiraely, izay mirakitra ireo didy sy fitsipika mifandraika amin'ny fanaovana sorona sy ny fanompoam-pivavahana tao amin'ny tempoly. (...) Tsy nofoanany kosa ny lalàna moraly ao anatin'ny didy folo sy nampiharin'ireo mpaminany. Tsy nanana tanjona hanaisotra ny ampahany amin'izany ny fahatongavany. Lalàna tsy azo ovana izany izay "mitoetra mafy toy ny vavolombelona mahatoky any an-danitra". (...) Tsy maintsy mitoetra manan-kery ho an'ny olombelona rehetra sy amin'ny vanim-potoana rehetra ny ampahany tsirairay amin'izany lalàna izany satria tsy miankina amin'ny fotoana na amin'ny toerana na koa amin'ny toe-javatra hafa mety hiova izany fa amin'ny toetran'Andriamanitra sy ny toetry ny olombelona ary ny fifandraisana tsy miova misy eo amin'izy ireo." — Upon Our Lord's Sermon on the Mount, Discourse V, John Wesley's Sermons: An Anthology (Nashville, TN: Abington Press, 1991), pp. 208, 209.
Ampitahao amin'ny Rôm. 7:11, 12; Sal. 19:7-11; Sal. 89:14; sy ny Sal. 119:142, 172 ny Eks. 34:5-7. Inona no ambaran'ireo andininy ireo antsika momba ny fifandraisana misy eo amin'ny lalàn'Andriamanitra sy ny toetrany?
Koa satria ny lalàn'Andriamanitra dia fandikana an-tsoratra ny toetrany, ary koa fanorenan'ny seza fiandrianany sy fototra iorenan'ny fitondrantenan'ny toetran'olombelona dia halan'i Satana izany. "Tsy nisy izay tsy nahita fa raha endrika na tandindon'ny any an-danitra ny fitoerana masina tety an-tany, dia kopia marin'ny lalàna ao amin'ny fiara any an-danitra ny lalàna napetraka tao amin'ny fiara teto an-tany; ary ny fanekena ny fahamarinana mikasika ny Fitoerana Masina any an-danitra dia mahafaoka ny fanekena ny fitakian'ny lalàn'Andriamanitra sy ny tsy maintsy hitandremana ny Sabatan'ny didy fahefatra. Teto ny tsiambaratelon'ny fanoherana mangidy sy hentitra natao tamin'ny fanazavana mirindra ny Soratra Masina izay nanambara ny fanompoana ataon' i Kristy ao amin'ny fitoerana masina any an-danitra." - HM, t. 449.
Inona ireo antony ilazan'ny olona matetika fa tsy voatery hitandrina ireo didy folo intsony isika? Araka ny hevitrao, inona no miafina ao ambadik'izany tohan-kevitra izany?