Vakio ny Mar. 1:1-8. Iza avy ireo "olona" voaresaka ao amin'ireo andininy ireo, ary inona no lazainy sy ataony?
Misy telo izy ireo no tena voaresaka ao: Jesôsy Kristy, Izay resahina ao amin'ny Mar. 1:1, Andriamanitra Ray (izay hita ao amin'ny and. 2), ary Jaona mpanao batisa, ilay mpitondra hafatra sy mpitoriteny, izay foto-dresaka ao amin'ireo andininy sisa manaraka.
Misy teny nalaina avy amin'ny TT ao amin'ny Mar. 1:2,3 izay ambaran'i Marka fa mitranga ao amin'ny tantara. Andininy 3 avy ao amin'ny TT no nampiarahin'i Marka ao amin'ireo andininy ireo: Eks. 23:20; Isa. 40:3, ary Mal. 3:1.
Vakio ny Eks.23:20; Isa. 40:3, ary Mal. 3:1. Inona no iraisan'ireo andininy ireo?
Miresaka momba ny anjely iray hirahin'Andriamanitra eo alohan'ny Isiraely mba hitondra azy ireo any amin'ny tany Kanàna ny Eks. 23:20. Ny Isa. 40:3 indray dia miresaka ny amin'ny fisehoan'Andriamanitra any an'efitra sy ny fanamboarana lalambe ho Azy. Ny malakia 3:1 kosa dia mikasika ny iraka iray mandeha eo alohan'ny Tompo, manamboatra ny lalany. Samy miresaka momba ny dia anankiray izy telo ireo.
Misy ifandraisany betsaka amin'ny asan'i Jaona mpanao batisa ny lahatsoratra ao amin'ny Isaia, sady mifantoka amin'ny lalan'ny Tompo ihany koa. Raha ny filazantsaran'i Marka dia misy "dia" ataon'i Jesôsy Tompo. Manamafy izany "dia" izany ny fomba fitantarana malaky ataon'ny mpanoratra. Tonga eo amin'ny hazo fijaliana sy ny nahafatesany ho sorona ho antsika ilay dia.
Maro anefa ireo zavatra tsy maintsy mitranga mialoha ny hahatongavana eo amin'ny hazo fijaliana. Vao miandoha ny dia, ary horesahin'i Marka amintsika ny mombamomba izany.
Araka ny teny ao amin'ny Mar. 1:2,3, izay avy ao amin'ny TT, dia niantso ny vahoaka ho amin'ny fibebahana, hiala amin'ny fahotana, sy hiverina amin'Andriamanitra (Mar. 1:4) i Jaona mpanao batisa. Nitafy tahaka an'i Elia mpaminany fahiny izy (ampitahao amin'ny 2 Mpanj. 1:8), ary niresaka momba Ilay ho avy aoriany, Izay lehibe noho izy, ao amin'ny Mar. 1:7,8. Ny nilazany hoe: "tsy mendrika hiondrika hamaha ny fehin-kapany aza aho", dia mampiseho ny toerana ambony omeny an'i Jesôsy.