« Fa isika tsy mitolona amin’ny nofo aman-drà, fa amin’ny fanapahana sy amin’ny fanjakana sy amin’ny mpanjakan’izao fahamaizinana izao, dia amin’ny fanahy ratsy eny amin’ny rivotra. »Efes. 6:12.
Mofon’aina:
Tsy dia midera firy ireo olona mahery fo voalaza ao anatiny ny Baiboly. Toerana kely dia kely no mba atokany hilazana ny toe-panahin’ireo olombelona tsara indrindra. Tsy nataotao foana izany fanginana izany fa mirakitra fampianarana. Fanomezana avy amin’Andriamanitra ny toetra tsara rehetra ananan’ny olona. Avy amin’ny fahasoavan’Andriamanitra ao amin’i Jesôsy Kristy ny asa soa vitany, ka an’i Jehôvah ny voninahitra. Fiasana eo am-pelatanan’Andriamanitra ihany ny olona, ka mampidi-doza ny mandoka azy, araka ny ampianaran’ny Baiboly antsika. Ho lavo tokoa izay mitoky amin’ny herin'ny tenany, noho ny fanadinoany fa tsy mahavita na inona na inona avy amin’ny herin’ny tenany izy. (...) Tsy azo atao ny miady irery sy handresy ny fahotana. Noho izany, izay rehetra miasa hahatonga antsika ho tsy manan-java- mahory, dia mampanalavitra antsika amin’Andriamanitra sy manomana lalana ho amin’ny faharesena.
Niroso nanao heloka bevava i Davida. Nanjary nangeja azy ny fandroboana sy ny fitaomana fetsin’ny fitiavam-pahefana sy renty. Tsy latsa- danja amin’izany koa ny varotra nataony tamin’ny firenena manodidina. Araka ny fomba fanao teo amin’ny mpanjaka tatsinanana, dia azo nekena ny fitondran-tena ratsy nataon’ny mpanjaka, izay tsy azo leferina teo amin’ny olona. Nisy fanomezana lalana ny mpanjaka, izay tsy nomena ny olon-tsotra mety maty. Vao mainka mampihena ny toetra maharikorikon’ny fahotana teo amin’i Davidajzany rehetra izany. Ny fahendreny sy ny heriny no nitokiany fa tsy niantehitra tamim- panetren-tena isan’andro tamin’ny herin’Andriamanitra izy. Tsy manaonao foana na mamely tampoka i Satana, mba handavoana antsika. Tsikelikely no handravany amin-kafetsena ireo fitsipika arahintsika sy hampanalavirany antsika amin’Andriamanitra; dia taominy isika hanao fahadisoana tsy dia manao ahoana loatra, ary farany, rehefa mahomby izy hahatonga antsika hianatra ny fanaon’izao tontolo izao, dia ezahiny indray ny hanaitra ireo faniriana maloto avy amin’ny filan’ny nofontsika. – CC, t. 177.