"Ny fanjakan'ny lanitra dia tahaka ny masirasira, izay nalain'ny vehivavy anankiray ka nataony tao amin'ny koba intelon'ny famarana, mandra-pahazon'ny masirasira azy rehetra." – Mat. 13:33.
Mofon’aina:
Tao amin'ny fanoharana nataon'ny Mpamonjy, ny masirasira dia nampiasainy hanehoana ny fanjakan'ny lanitra. Maneho an-tsary ny herin'ny fahasoavan'Andriamanitra mamelombelona sy manavao izany. (...)
Ny fahasoavan'Andriamanitra dia tsy maintsy raisin'ny mpanota alohan'ny hahatonga azy ho mendrika ny fanjakan'ny voninahitra. Ny fahalalana sy ny fanabeazana rehetra azon'izao tontolo izao omena dia tsy hahomby eo amin'ny fanovana ny zanaky ny fahotana efa simba ho tonga zanaky ny lanitra. Tsy maintsy ho avy amin'Andriamanitra ny hery manavao. (...) Tahaka ny masirasira miharo amin'ny koba miasa avy ao anatiny ka miseho ety ivelany, no fiasan'ny fahasoavan'Andriamanitra hanova ny fiainana amin'ny fanavaozana ny fo. (...)
Ny masirasira voafina ao amin'ny koba dia miasa amin'ny fomba tsy hita maso hampiakatra ny vongana manontolo; dia toy izany koa ny masirasiran'ny fahamarinana, miasa mangina sy miafina ary tsy mijanona izy mba hanova fanahy. Mihamalefaka sy voafehy ny fironana ara-nofo. Fisainana vaovao, fahatsapana vaovao, ainga vaovao no tafaorina. Faneva vaovaon'ny toetra amam-panahy no voatsangana, dia ny fiainan'i Kristy. Voaova ny saina, voahetsika ireo manao zavatra hifantoka ho amin'ny sori-dalana vaovao. (...) Mifoha ny feon'ny fieritreretana. (...)
Ny fon' izay mandray ny fahasoavan'ny lanitra dia ho feno fitiavana an'Andriamanitra sy an' ireo nanoloran'i Kristy ny ainy. (...) Malemy fanahy sy malina izy, manetry tena izy momba ny fiheverany ny tenany, nefa dia feno fanantenana matoky mandrakariva ny famindrampo sy ny fitiavan'Andriamanitra. (...)
Tokony hifehy ny toe-po sy ny feo ny fahasoavan'i Kristy. Ho hita ny asany eo amin'ny fanajana sy ny fomba fijery feno fitiavana asehony amin'ny rahalahiny, ary amin'ny teny malefaka feno fitiavana sy mampahery. Tsapa ny fanatrehan'ny anjely ao an-tokantrano. Ny fiainana dia mamoaka fofo-manitra izay miakatra any amin'Andriamanitra ho toy ny fofon'ny ditin-kazo manitra masina. Miseho amin'ny fahalemem-panahy sy ny hatsaram-panahy sy fandeferana ary fahari-po ny fitiavana. Miova ny endrika. Mamirapiratra eo amin'ny endrik'ireo izay tia Azy sy mitandrina ny didiny i Kristy mitoetra ao am-po. (...). Rehefa tanteraka ireo fanovana ireo, dia velon-kira, feno hobim-pifaliana sy fahasambarana ny anjely, ary Andriamanitra sy i Kristy dia ravoravo noho ireo fanahy voavolavola araka ny fitoviana amin'Andriamanitra. – GAG, t. 18.