"Ny hanao ny sitraponao, Andriamanitra ô, no sitrako; ary ny lalanao no ato anatiko." Sal. 40:8.
Mofon’aina:
Manao ahoana loatra izao Andriamanitsika izao! Tananany amim-pahendrena sy fitandremana ny fanjakany, ary nanamboatra fefy manodidina ny olony Izy, dia ny Didy folo, ho fiarovana azy ireo amin'ny vokatry ny fandikan-dalàna. Takiny ny hankatoavan'ny olona ny lalàn'ny fanjakany, fa amin'izany no anomezany azy harena, fahasambarana, fiadanana, ary fifaliana. Mampianatra azy ireo Izy fa ny fifankazarana amin'ny Teniny ihany no hahatrarany ny fahatanterahan-toetra izay takiny.
Izay mikatsaka marina ny ho tahaka an'i Jesôsy, eo amin'ny fiteny sy ny fiainana ary ny toetra, no hahita Azy, ka hovana ho araka ny endriny amin'ny alalan'ny fibanjinana Azy. Iriny fatratra sy trotroiny amim-bavaka mantsy ny hanana ny fomba sy ny saina izay tao amin'i Kristy Jesôsy. (...) Mangetaheta an'Andriamanitra izy. Manjary midika zava-dehibe ho azy ny tantaran'ny Mpanavotra azy sy ny sorona tsy misy fetra nataony. Tonga mahantra Ilay Mpanjakan'ny lanitra mba hampanan-karena antsika ny fahantrany, tsy hanan-karena fahaizana fotsiny isika fa hahavita zava-dehibe maro koa.
Ireo dia harena izay tian'i Kristy tokoa mba hananan'ireo mpanara-dia Azy. Rehefa mamaky ny Tenin' Andriamanitra ny mpikatsaka marina ny fahamarinana ka manokatra ny sainy handray ny Teny, dia haniry fatratra ny fahamarinana amin'ny fony manontolo. Manjary hetahetan'ny fanahiny ny hanam-pitiavana, fangorahana, fahamoram-panahy, fanajana, ary fahalalam-pomba kristianina, izay toetra mampiavaka ilay fonenana any an-danitra amboarin'i Kristy ho an' ireo izay tia Azy. Tsy azo hozongozonina izy amin'ny fanatrarana ny tanjony. Tapa-kevitra hiandany amin'ny fahamarinana izy. Nahita lalana hidirana ao am-po ny fahamarinana ka mamaka ao noho ny asan'ny Fanahy Masina, Izay fahamarinana. Rehefa fehezin'ny fahamarinana ny fo dia hita mazava izany amin'ny fahatongavan'ilay olona ho mpitandrina tsara ny fahasoavan'i Kristy.
Manana ny andraikiny manokana ny mpitandrina tsirairay ho fampandrosoana ny fanjakan ' Andriamanitra. (...) Natao hampitomboina ho voninahitr' Andriamanitra sy hanohanana ny fanjakany ny talentan' ny fiteny, ny fitadidiana, ny hery miasa mangina, ary ny fananana. Hotahiny ny fampiasana araka ny tokony ho izy ireo fanomezam-pahasoavana avy Aminy. —GAG, t. 61.