"(...) Mangataha, dia hahazo hianareo, mba ho tanteraka ny fifalianareo." — Jao. 16:24.
Mofon’aina:
Ny vavaka no fomba mahomby voatendrin'ny lanitra hanoherana ny ota sy hampitom-boana ny toetra kristianina. Ny hery miasa mangina avy any an-danitra avy amin'ny vavaka atao amim-pinoana no hanatanteraka ao amin'ny fanahin'ilay mpangataka izay rehetra nangatahiny. Azontsika angatahina ny famelan-keloka, ny Fanahy Masina, ny toetra tahaka ny an'i Kristy, ny fahendrena sy ny hery hanaovana ny asany, izay fanomezana rehetra efa nampanantenainy. Izao mantsy no teny fikasany: "Hahazo hianareo."
Mpamonjy antsika i Jesôsy; tsy maintsy mandresy isika ao Aminy sy amin'ny alalany (...). Miandry ny fangatahantsika ny fahasoavan'i Kristy. Hahazo hery sy fahasoavana araka izay ilaintsika isika raha mangataka Aminy (...). Hifehy ny filana tsy masina rehetra ny fivavahan'i Kristy, handrisika ny hery, ny fifehezan-tena sy ny asa, eny, na amin'ny raharaha andavanandro aza, ka mahatonga antsika hahay mitantana, hahay hifandray amin'ny hafa, hahay handà tena, ary ho zakantsika tsy amim-pimonomononana na dia ny tsy fisiana aza. Hiseho eo amin'ny toetra ny Fanahin'i Kristy mitoetra ao am-po, hamolavola fahamendrehana sy hery. "Ampy ho anao ny fahasoavako", hoy i Kristy — 2 Kôr. 12:9.
Ataovy ny ezaka rehetra hifandraisan'ny fanahinao tsy tapaka amin'i Jesôsy (...). Tokony hivavaka ny mpianakavy, ary ambonin'ny zavatra rehetra, tsy azontsika atao tsirambina ny vavaka mangina, fa izany no ain'ny fanahy. (...). Aoka ny fanahy, ao amin'ny mangina, hanaiky ho eo ambanin'ny fijerin'Andriamanitra mpamotopototra. Ilay Mpihaino vavaka irery ihany no natao handre ny vavaka atao ao amin'ny mangingina. Tsy misy sofina lian-kahafantatra fotsiny tokony handray ny vesatry ny fitalahoana toy izany. (...) Mifandray amin'Andriamanitra amim-pinoana sy fahatsorana ary fitoniana ny fanahy, ka manangona ho azy ireo tara-pahazavan'ny lanitra izay hanatanjaka sy hanohana azy ao anatin'ny adiny amin'i Satana. ( . . . )
Mivavaha ao an'efitranonao, ary raha hamonjy ny raharahanao anda-vanandro ianao, dia aoka ny fonao hisandratra matetika any amin'Andriamanitra. Toy izany no niarahan'i Enôka nandeha tamin'Andriamanitra. Tahaka ny hanitra sarobidy misandratra eo anatrehan'ny seza fiandrianan'ny fahasoavana ireny vavaka mangina ireny. Tsy hain'i Satana resena izay manana fo mitoetra eo amin'Andriamanitra toy izany. — GAG, t. 239.