« Ary ho an’izay mahay manao mihoatra noho ny zavatra rehetra, eny, mihoatra lavitra noho izay rehetra angatahintsika na heverintsika aza, araka ny hery izay miasa ato amintsika." - Efes. 3:20.
Mofon’aina:
Miandry fotsiny haneho ny fahasoavany sy ny heriny amin'ny alalan'ny vahoakany ny Tompo. Takiny anefa ny hifantohan'ny fisainan'ireo izay manolo-tena hanompo Azy, Aminy mandrakariva. Tokony hanam-potoana hamakiana ny Tenin'Andriamanitra sy hivavahana isan'andro izy ireo. (...)
Isam-batan'olona no tsy maintsy iarahantsika mandeha sy iresahantsika amin'Andriamanitra, dia hiseho eo amin'ny fiainantsika amin'ny hasarobidiny rehetra ny hery masin'ny filazantsaran' i Kristy.
Lehibe lavitra no ambaran'ny fiainana mangina sy mahatokin'ny Kristianina madio sy marina, mihoatra noho ny teny maro. Manan-kery lavitra noho ny teny ambarany ny maha-izy ny olona iray. Nanao tatitra ireo mpiandry raharaha nirahina tany amin'i Jesôsy fa tsy mbola nisy olona niteny tahaka Azy. Kanefa ny anton'izany dia satria tsy mbola nisy olona nanana fiainana tahaka ny fiainany. Raha hafa ny fiainany dia tsy ho niteny tahaka izay nataony Izy. Nisy hery mandresy lahatra tao amin'ny teniny satria niloatra avy ao amin'ny fo madio sy marina izany, be fitiavana sy fangorahana, malala-tanana sy marina. (...)
Ny filazantsara izay torintsika mba hamonjena fanahy dia tsy maintsy ho ny filazantsara izay mamonjy ny fanahintsika. Tsy hisy fiantraikany amin'ny tontolo tsy mino ny hery miasa mangina avy amintsika raha tsy amin'ny alalan'ny finoana velona an'i Kristy amin'ny maha-Mpamonjy ny tenantsika manokana Azy. Raha tiantsika ny hahasintona ny mpanota tsy ho voafaokan'ny riaka mahery, dia tsy maintsy miorina mafy eo amin'Ilay Vatolampy ny tongotsika, dia i Kristy.
Ny karatra amantarana ny maha-Kristianina antsika dia tsy karatra azo tsapain-tanana ety ivelany, tsy ny fiambozonana hazo fijaliana na satroboninahitra izany, fa manambara ny firaisan'ny olombelona amin'Andriamanitra. Ny herin'ny fahasoavan'Andriamanitra izay miseho amin'ny alalan'ny fanovana ny toetra dia natao handresy lahatra fa naniraka ny Zanany ho Mpanavotra izao tontolo izao tokoa Andriamanitra. Amin'izay rehetra manodidina ny fanahin'ny olombelona dia tsy misy manana hery tahaka ny fiainana tsy misy fitiavan-tena. Ny Kristianina be fitiavana sy mahate-ho tia no tohan-kevitra mafonja indrindra manohana ny filazantsara. —GAG, t. 276.